Israɛlden sungurunin dɔ tun be Siri jamana na. A yɔrɔ tun ka jan ni a faso ye. Siri sɔrɔdasiw y’a bɔsi a somɔgɔw la. Sisan a kɛra kɛlɛbolo dɔ kuntigi ka muso baarakɛden ye. O kuntigi tɔgɔ ko Naaman. O sungurunin tun be Jehova bato k’a sɔrɔ a sigiɲɔgɔnw t’o kɛ.

Farigolo bana juguman dɔ tun be Naaman la ani o tun b’a sɛgɛn tuma bɛɛ. Israɛlden sungurunin tun b’a fɛ k’a dɛmɛ sɔbɛ la. A y’a fɔ Naaman muso ye ko: ‘Ne be mɔgɔ dɔ lɔn min be se k’a kɛ i cɛɛ fari be nɔgɔya. Jehova ka kira dɔ be Israɛl, a tɔgɔ ko Elize. A be se k’i cɛɛ kɛnɛya.’

Naaman muso ye sungurunin ka kumaw lakali a ye. Naaman tun labilanin lo ka koo bɛɛ kɛ walisa ka kɛnɛya. O kosɔn, a tagara Elize fɛ Israɛl. Naaman ka miiri la, Elize tun bena ale bisimila mɔgɔbaya la. Nka sanni Elize yɛrɛ ka taga kuma Naaman fɛ, a y’a ka baaraden lo bila ka taga Naaman kunbɛn  ani k’a fɔ a ye ko: ‘Taga ko Zurudɛn baji la siɲɛ wolonfila. O la, i bena kɛnɛya.’

Naaman dusu tiɲɛna kosɔbɛ. A ko: ‘Ne tun b’a miiri k’o kira tun bena a ka Ala deli ani k’a bolow kɛ k’an saalo. Sanni a k’o kɛ, a ko n’ ka taga ko o baji la Israɛl. Baji fisamanw b’an fɛ Siri. Mun na n’ tɛ se ka taga yen?’ Naaman dimina ani a bɔra Elize ka soo.

Naaman ka baaradenw y’a dɛmɛ ka miiri koɲuman. U y’a fɔ a ye ko: ‘I tun t’a fɛ ka koo bɛɛ kɛ walisa ka kɛnɛya wa? Kira ko i ka min kɛ, o ka nɔgɔ yɛrɛ le. Mun na i t’o kɛ?’ Naaman ye mɛnni kɛ u fɛ. A tagara ko Zurudɛn baji la siɲɛ wolonfila. A siɲɛ wolonfilanan na, Naaman bɔra jii kɔnɔ, a kɛnɛyara pewu. A dusu tun fanin lo waleɲumanlɔn na. A kɔsegira ka taga Elize fo. Naaman ko: ‘Ne y’a lɔn sisan ko Jehova lo ye tiɲɛn Ala ye.’ Ele fɛ, Naaman kɛnɛyanin kɔsegira tuma min na, o koo ye mun lo kɛ Israɛlden sungurunin la do?