Im Land Syrie lebt es chliises israelitisches Meitli. Si isch wiit weg vo Israel, wo si dehei isch. Di syrischi Armee het si eifach vo ihrem Mami und ihrem Papi weggno. Si wird zwunge, für d Frau vom Naaman z schaffe. De Naaman isch de Chef vo de syrische Armee. S Meitli betet als Einzigi Jehova a, au wenn alli um si ume nid a Jehova glaubed.

De Naaman het e schlimmi Huutchrankheit, wo ihm di ganzi Ziit weh tuet. Er tuet em Meitli sehr leid. Drum seit si zu de Frau vom Naaman: «Ich kenn öpper, wo dim Maa cha helfe. De Elisa! Er isch en Prophet vo Jehova und wohnt z Israel. Er cha din Maa gsund mache.»

D Frau vom Naaman verzellt ihrem Maa, was s Meitli gseit het. Wil de Naaman alles wett usprobiere, zum wider gsund z werde, macht er sich uf de Weg. Er gaht uf Israel zum Elisa hei. Er erwartet, dass de Elisa ihn wie e wichtigi Person begrüesst. Aber de Elisa schickt nume en Diener use, wo ihm laat la usrichte: «Gang, wäsch dich sibe Mal im Jordan. Denn wirsch du wider gsund.»

De Naaman isch sehr enttüscht. Er seit: «Ich ha denkt, de Prophet rüeft zu sim Gott, bewegt sini Händ über mir hii und her und heilt mich eso. Aber jetzt söll ich zu dem Fluss da z Israel gah. Bi üs z Syrie gits vil di bessere Flüss. Wiso cha ich nid dörthii gah?» Er isch verruckt und lauft devo.

D Diener vom Naaman helfed ihm aber, dass er wider klar cha denke. Si säged ihm: «Du würdisch doch alles mache, zum wider gsund z werde? Und das, wo de Prophet gseit het, isch doch eso eifach. Wiso probiersch es nid eifach emal us?» De Naaman lost uf si und gaht zum Fluss. Dört taucht er sibe Mal unter s Wasser. Wo er nach em sibete Mal uftaucht, isch er völlig gsund. De Naaman isch überglücklich und gaht zrugg zum Elisa, zum Danke z säge. Er seit: «Jetzt weiss ich, Jehova isch de einzig wahr Gott.» Chasch du dir vorstelle, wie sich das israelitische Meitli fühlt, wo de Naaman wider gsund zruggchunnt?