Suluʼu tü mmakat Siria, eejatü wanee jintut israeliita. Wattasü maʼin shia noulia na süpüshikana. Amaanüsü shia shipialuʼujee, shipiunasesü nuʼwayuuse wanee wayuu sülaülakai surulaat, Naamán nünülia. Nia Jeʼwaa chi suʼwaajakai tü jintutkat mayaainjeʼe nnojoluin nuʼwaajünüin Jeʼwaa natuma na waneinnua.

Müliashi Naamán sutuma wanee ayuulii aisü maʼin, ajaʼttüsü nüta sutuma. Sükaaliinjeein nia tü jintutkat. Sümaka sümüin nuʼwayuuse Naamán: «Tatüjaa aaʼu jaralin aneechin atuma chi puʼwayuusekai. Eeshi wanee wayuu nünüikimaajachi Jeʼwaa kepiashi chaa Israel, Eliseo nünülia. Aneechi nia nutuma».

Süküjaka tü wayuukot nümüin Naamán süchiki tü sümakat tü jintutkat. Süka aneein maʼin Naamán, nuʼunaka Israelmüin nipialuʼumüin Eliseo. Kojutuinjachia maʼin atumawaa Naamán naaʼinruʼu nüntapa nipialuʼumüin Eliseo. Nnojotpajaʼa müin nukuwaʼipa atumawaa. Nnojoishi ojuʼitüin Eliseo süpüla naashajaain nümaa, nuluwataain neʼe wanee wayuu aʼyataai nümüin süpüla niainjachin aküjain tü kasa naaʼinrüinjatkat Naamán. «Chainjachi pia eemüin tü süchikat Jordán, emetüinjachi pia akaratshitua shiroku tü süchikat,  aneechika pia», nümaka chi wayuukai nümüin Naamán.

Mojushiisü tia nümüin Naamán, müshi nia: «Kasayaa wayu naaʼinrüinjatka taaʼinruʼu wayuukai chii. Yalejewaain müinjatia najapü taaʼinruʼu sünain achuntaa nümüin chi Nümaleiwasekai. Shiaka neʼe nüküjain tamüin chainjachin taya eemüin wanee süchi yaakat Israel. Anaʼleesia tü süchikalüirua chakat Siria. ¿Aashin shiain anain süpüla temetüin shiroku tia süchikalüirua?». Nuʼunaka Naamán nipialuʼujee Eliseo sümaa jashichin maʼin nia.

Nemeʼejüin naaʼin Naamán na nüchepchiakana. «¿Aashin aneein pia suulia tü ayuuliikat? Nnojotsü kapüleein tü nuchuntakat chi nünüikimaajachikai Maleiwa, anasü paaʼinrüle shia», namakalaka nümüin. Jaa müshi Naamán namüin, nuʼunaka eemüin tü süchikat Jordán, nimetaka akaratshitua shiroku. Anaka nia nimetapa akaratshitua shiroku. Talatashaatashi nia sutuma naawalaaichipain. Nüleʼejaka nüchikuaʼa nipialuʼumüin Eliseo süpüla naapüin analuʼut nümüin. «Tatüjaaichipa aaʼu niain Jeʼwaa chi Maleiwa shiimainshikai», nümaka Naamán. Oʼunushi Naamán nipialuʼumüin sümaa anaichipain nia. ¿Jamüsüche saaʼin tü jintutkat shiʼrapa anain Naamán?