Mehi raSirie, mwa ri okakazona Okaisrael ku kari kokure tjinene nonganda. Oko ka toorwa i otjimbumba tjovita tjaSirie, nu karira okakarere komukazendu womuhongore wotjimbumba tjovita wena Naaman. Okakazona nga aake rikotamene ku Jehova, nandarire kutja ovandu varwe ongondoroka na ko kaave tjiti nao.

Naaman wa verere omutjise omuvi, nu eye aa kara momihihamo eyuva arihe. Okakazona nga tjiri aake vanga okumuvatera. Oko ka raera omukazendu waNaaman ake tja: ‘Ami me tjiwa omundu ngu ma yenene okuverukisa omurumendu woye. MoIsrael muna omuprofete waJehova wena Elisa. Eye ma yenene okuverukisa omurumendu woye.’

Omukazendu waNaaman wa karaera omurumendu we oviṋa okakazona mbi ke mu raere. Naaman aa vanga okurora otjiṋa atjihe tji matji mu verukisa, okutja eye otja ya kondjuwo yaElisa koIsrael. Naaman aa undjire ko kutja Elisa me mu tjindi otjomundu omunahepero. Posiya moruveze rwokuhungira kuna ye omuini, Elisa  wa hinda omukarere we okukakorisa Naaman nokumupa ombuze ndji: ‘Ke rikohe mOnḓonḓu Jordan povikando hambombari, otji mo veruka.’

Naaman wa pindikire tjinene. Eye wa tja: ‘Ami mbe ripura kutja omuprofete ngwi ma piti okundjiyambeka omake nokukumba ku Muhona kutja mbi veruke. Posiya me ndji raere kutja hi kerikohe monḓonḓu moIsrael. Eṱe tu nozonḓonḓu ozombwa kombanda ya indji moSirie. Ongwaye tji mbi hina okuyenda ngo uriri?’ Naaman wa pindika, na zapo pondjuwo yaElisa.

Ovakarere vaNaaman ve mu vatera kutja me ripure nawa. Owo va tja: ‘Ove ongwaye tji u hina okutjita otjiṋa atjihe tji mo raerwa kutja u veruke? Otjiṋa omuprofete tje ku raere okutjita otjipupu. Ongwaye tji u hina okutjita uriri?’ Naaman wa puratena ku wo, ai kOnḓonḓu Jordan nu a ka hita momeva nerikoho povikando hambombari. Kombunda yotjikando otjitjahambombari, Naaman wa pita momeva a veruka. Eye wa ri nondangi tjinene, nu wa yaruka okukatja ndangi ku Elisa. Naaman wa tja: ‘Nambano ami me tjiwa kutja kapena Ndjambi warwe watjiri.’ Mo munu kutja okakazona Okaisrael kari nondjoroka ndji ṱa pi, indu Naaman tja kotoka konganda a veruka?