Adda maysa a balasitang nga Israelita a naipan idiay Siria, maysa a lugar nga adayo iti balayda. Innala isuna dagiti soldado ti Siria iti pamiliana ket nagbalin nga adipen ti asawa ti maysa a lider dagiti soldado nga agnagan Naaman. Uray no saan nga agdaydayaw ken Jehova dagiti tattao iti ayanna, nagdaydayaw latta ti balasitang ken Jehova.

Adda nakaro a sakit iti kudil ni Naaman. Nakasaksakit dayta. Kayat ti balasitang a tulongan isu nga imbagana iti asawa ni Naaman: ‘Adda ammok a makapaimbag iti asawayo. Adda propeta ni Jehova idiay Israel nga agnagan Eliseo. Mapaimbagna ti asawayo.’

Imbaga ti asawa ni Naaman ken lakayna ti imbaga ti balasitang. Kayat ni Naaman nga aramiden ti amin tapno umimbag, isu a napan iti balay ni Eliseo idiay Israel. Impagarup ni Naaman nga awaten isuna ni Eliseo kas espesial a tao. Ngem imbes a makisarita ni Eliseo kenkuana, imbaonna ti adipenna a mangsabat ken Naaman ken  impaibagana: ‘Mapanka agdigus iti mamimpito idiay Karayan Jordan ket umimbagkanto.’

Nakaunget ni Naaman. Imbagana: ‘Kunak no paimbagennak daytoy a propeta babaen iti panangawagna iti Diosna ken panangilabaslabasna iti imana iti bagik. Ngem ibaonnak ketdin a mapan iti dayta a karayan ti Israel. Maymayat dagiti karayan idiay Siria. Apay a di pay la sadiay ti papanak?’ Nakapungtot ni Naaman, ket pimmanaw iti balay ni Eliseo.

Ni Naaman ket tinulongan dagiti adipenna nga agpanunot a naimbag. Imbagada kenkuana: ‘Saan kadi nga aramidem ti amin tapno umimbagka? Naglaka laeng ti ipapaaramid kenka ti propeta. Apay a saanmo nga aramiden?’ Dimngeg ni Naaman. Napan iti Karayan Jordan ket bimmatok iti namimpito. Kalpasan ti maikapito a panagbatok ni Naaman, naimbagen ti sakitna. Naragsakan unay ket nagsubli ken Eliseo tapno agyaman. Imbaga ni Naaman: ‘Ammok itan a ni Jehova ti pudno a Dios.’ Panagkunam, ania ti narikna ti balasitang nga Israelita idi nagawid ni Naaman ket nakitana a naimbagen?