Vaĩ kelĩtu kamwe Kamũisilaeli kekalaa nthĩ ya Silia ĩla yaĩ vaasa mũno na mũsyĩ kwoo. Kelĩtu kau kaumĩtwʼe mũsyĩ kwoo nĩ asikalĩ ma Silia, na kathũkũmaa ta mũthũkũmi wa mũka wa mũnene wa asikalĩ ma Silia weetawa Naamani. Kelĩtu kau kamũthaithaa Yeova, o na kau andũ ala angĩ kũu kekalaa mayamũthaithaa.

Naamani aĩ na ũwau mũthũku mũno wa kĩkonde, na ekalaa ayalwʼa mũno. Kelĩtu kau kanini nĩkendaa mũno kũmũtetheesya. Kwoou katavisye mũka wa Naamani atĩĩ: ‘Nĩnĩsĩ mũndũ ũtonya kũvosya mũũme waku. Nthĩ ya Isilaeli kwĩ mwathani wa Yeova wĩtawa Elisa, na no avosye mũũme waku.’

Mũka wa Naamani nĩwatavisye mũũme wake ũndũ kelĩtu kau kamwĩie. Naamani nĩweeyũmbanĩtye kũtata kĩla ũndũ nĩ kana avoe, kwoou athi nthĩ ya Isilaeli, mũsyĩ kwa Elisa. Naamani asũanĩaa Elisa ta ũkũmũthokya ta mũndũ wa vata mũno. Ĩndĩ Elisa ndaaneena na Naamani, vandũ va ũu atũmie mũthũkũmi wake akamwĩe: ‘Thi  ũkathambe mavinda mũonza Ũsĩnĩ wa Yolotani na nũũvoa.’

Yĩla Naamani weewie ũũ nĩwatũlĩkile ngoo mũno. Aisye: ‘Nĩonaa mwathani ũsu evoya Ngai wake na aivĩtĩlya moko make ĩũlũ wakwa nĩ kana nĩvoe. Ĩndĩ vandũ va ũu, aĩ embĩa nĩthi ngathambe ũsĩnĩ wĩ kũũ Isilaeli. Twĩ na mbũsĩ nzeango kwitũ Silia. Nĩkĩ ndathi kũu?’ Naamani nĩwathatie na auma mũsyĩ kwa Elisa.

Athũkũmi ma Naamani nĩmamũtetheeisye kũsũanĩa nesa. Mamwĩie atĩĩ: ‘Ethĩwa wĩenda kũvoa, ndwaĩle kwĩka kyonthe kĩla watavwʼa? Kĩla mwathani ũsu ũkũtavisye wĩke no kĩndũ kĩnini. No wĩka oou?’ Naamani nĩweethukĩĩisye ũndũ athũkũmi make mamũtavisye, na kwoou athi Ũsĩnĩ wa Yolotani na eethika mavinda mũonza. Amina kwĩthika ĩvinda ya mũonza, Naamani nĩwaumie kĩwʼũnĩ e mũvou vyũ. Eewie mũyo mũno na ũu watuma asyoka akamũtũngĩe Elisa mũvea. Amwĩie: ‘Yu nĩnamanya kana Yeova nĩ Ngai wa wʼo.’ Wĩsũanĩa kala kelĩtu Kamũisilaeli keewie ata yĩla Naamani wasyokie e mũvou?