Izrayɛɛlɩ halɩbɩɣa nakɛyɛ kaawɛ poliŋ nɛ kɛ-tɛ, ɖooo Siirii ɛjaɖɛ taa. Siirii sɔɔjanaa kpanɩ-kɛ yomiye nɛ powoni-kɛ nɛ kalakɩ tʋmɩyɛ sɔɔjanaa ñʋʋdʋ Namaanɩ ɖɩɣa taa. Kɛsɛɣaɣ Yehowa; ɛlɛ mba pɛ-hɛkʋ taa kaawɛɛ yɔ, paba ñataasɛɣ Yehowa.

Namaanɩ kaawɛnɩ kʋdɔŋ sɔsɔʋ nakʋyʋ, nɛ kɩwɛɛkɩɣ e-tomnaɣ nɛ kɩɖʋʋ-ɩ wɩzasɩ paa ɛzɩmtaa. Halɩbɩɣa cikpelaɣ ŋga kaasɔɔlaa kpem se kala nabʋyʋ nɛ kasɩnɩ-ɩ. Pʋyɔɔ kowobi keheyi Namaanɩ halʋ se: ‘Mansɩm weyi ɛpɩzɩɣ ɛla nɛ ña-walʋ yɔɔ cɛ yɔ. Yehowa nayʋ nɔɔyʋ wɛ Izrayɛɛlɩ nɛ payaɣ-ɩ se Eliizee, ɛpɩzɩɣ nɛ ɛwaa ña-walʋ kʋdɔŋ.’

Namaanɩ halʋ kpaɣ tɔm ndʋ halɩbɩɣa ŋga kɔyɔɔdaa yɔ nɛ eheyi ɛ-walʋ. Namaanɩ kaasɔɔlaa kpem se ɛ-yɔɔ ɛcɛ, pʋyɔɔ ewobi Eliizee cɔlɔ Izrayɛɛlɩ tɛtʋ taa. Namaanɩ kaamaɣzaɣ se  Eliizee kaɣ nabʋyʋ labʋ nɛ pɩwɩlɩ se ɛkɛ ɛyʋ sɔsɔ. Ɛlɛ Eliizee titiiwobu ɛ-maɣmaɣ se ɛyɔɔdɩnɩ-ɩ. Etiyi ɛ-lɩmɖʋyʋ na se ewolo nɛ eheyi-i se: ‘Wolo Yɔɔrdaŋ Pɔɔ ta nɛ ŋsɔ lɩm tam lʋbɛ, nɛ ñɔ-yɔɔ cɛ.’

Namaanɩ taa tɩla leleŋ paa ññɩɩ. Ɛyɔɔdaa se: ‘Maamaɣzaɣ se nayʋ ɛnʋ ɛkɔŋ ɛ-maɣmaɣ nɛ ɛkpazɩ e-nesi nɛ ɛtɩnɩ mɔ-yɔɔ nɛ ɛtɩmnɩ ɛ-Ɛsɔ nɛ mɔ-yɔɔ cɛ. Ɛlɛ ɛtɩla mbʋ nɛ eheyiɣ-m se mowolo Izrayɛɛlɩ pɔɔ taa. Ɛmaɣzɩɣ se pɔsɩ fɛyɩ Siirii yaa we?’ Ɛbɛ yɔɔ etiheyi-m se mowolo sɩ-taa? Namaanɩ kɔ pana nɛ ɛlɩɩ Eliizee tɛ nɛ ɛɖɛɛ.

Pɛɖɛɣaɣ lɛ, ɛ-lɩmɖʋyaa tendi-i se ɛtaala mbʋ. Ɛ-lɩmɖʋyaa mba pɔpɔzɩ-ɩ se: ‘Paa ɛbɛ pɔtɔm se ŋla, ŋŋlakɩ nɛ ñɔ-yɔɔ cɛ? Mbʋ nayʋ ɛnɛ eheyi-ŋ se ŋla yɔ, pɩfɛyɩ kaɖɛ paa ññɩɩ, pɩɩwɛɣ ɖeu se ŋla mbʋ yaa we?’ Namaanɩ welisini ɛ-lɩmɖʋyaa mba nɛ etii Yɔɔrdaŋ pɔɔ taa nɛ ɛsɔ lɩm tam lʋbɛ. Namaanɩ tibi pɔɔ taa tam lʋbɛ ɖeɖe nɛ ɛlɩɩ lɛ, ɛna se ɛ-yɔɔ cɛbɩ cɩɖɩ cɩɖɩ. Pɩlabɩ-ɩ leleŋ siŋŋ nɛ ɛpɩsɩ Eliizee cɔlɔ nɛ eheyi-i se: ‘Lɛɛlɛɛyɔ manawa se Yehowa kɛnɩ Ɛsɔ toovenim tʋ.’ Ña-naʋ taa yɔ, Izrayɛɛlɩ halɩbɩɣa cikpelaɣ ŋga, ka-taa tɩla leleŋ siŋŋ, alɩwaatʋ ndʋ Namaanɩ yɔɔ cɛba nɛ ɛpɩsɩ ɛ-tɛ yɔ?