Insay di land na Siria, wan Izrɛlayt titi bin de de we bin de fa frɔm usay i kɔmɔt. Di Sirian sojaman dɛn bin pul am kɔmɔt nia in famili, ɛn dɛn mek i kam bi savant fɔ wan uman we in man nem Neman. Neman na bin di bigman fɔ ɔl di sojaman dɛn. Dis smɔl titi bin de wɔship Jiova, pan ɔl we di pipul dɛn we bin de arawnd am nɔ bin de wɔship am.

Neman bin gɛt wan bad bad sik na in bɔdi we bin de mek i rili fil pen ɔltɛm. Di smɔl titi bin rili want fɔ ɛp am. I tɛl Neman in wɛf se: ‘A sabi pɔsin we go mek yu man wɛl. Jiova in prɔfɛt we nem Ilaysha de na Izrɛl. I go mɛn yu man.’

Neman in wɛf bin tɛl am wetin di smɔl titi se. Neman bin rɛdi fɔ du ɛnitin fɔ mek i wɛl, so i bin go na Ilaysha in os na Izrɛl. Neman bin tink se Ilaysha fɔ wɛlkɔm am lɛk wan impɔtant pɔsin. Bɔt Ilaysha nɔ bin go mit Neman fɔ tɔk to am, bifo dat,  i sɛn in savant fɔ go grit am ɛn tɛl am se: ‘Go was na di Jɔdan Riva sɛvin tɛm. Dɔn yu go wɛl.’

Neman in at bin rili pwɛl. I tɔk se: ‘A bin tink se dis prɔfɛt go mek a wɛl bay we i go kɔl in Gɔd ɛn wev in an pan mi. Bifo dat, i tɛl mi fɔ go na dis riva we de na Izrɛl. Wi gɛt bɛtɛ riva dɛn na Siria. Wetin mek a nɔ go jɔs go was de?’ Neman vɛks ɛn kɔmɔt na Ilaysha in os.

Neman in savant dɛn ɛp am fɔ tink di rayt we. Dɛn tɛl am se: ‘Yu nɔ go du ɛnitin fɔ mek yu wɛl? Wetin dis prɔfɛt tɛl yu rili izi fɔ du. Wetin mek yu nɔ go du am?’ Neman lisin to dɛn. I go na di Jɔdan Riva ɛn was insay di wata fɔ sɛvin tɛm. Afta we Neman was insay di wata fɔ sɛvin tɛm, i kɔmɔt insay di wata, ɛn i bin dɔn wɛl. I bin rili gladi fɔ dat, ɛn i go bak fɔ go tɛl Ilaysha tɛnki. Neman tɔk se: ‘Na naw a no se Jiova na di tru Gɔd.’ Aw yu tink se di smɔl titi go dɔn fil we i si Neman kam bak in wɛl wan?