တၢ်မၤလိ ၅၁
သုးခိၣ်ဖးဒိၣ် ဒီးပိာ်မုၣ်ဖိတဂၤ
ပှၤအံၣ်စရ့လးပိာ်မုၣ်ဖိတဂၤ ဘၣ်လဲၤအိၣ်လၢကီၢ်စူၤရံလၢ အအိၣ်ယံၤဒီးအဟံၣ်လီၤ. ပိာ်မုၣ်ဖိတဂၤအံၤန့ၣ် ပှၤစူၤရံအသုးက့ၤဖီၣ်န့ၢ်အီၤလီၤ. ခဲအံၤန့ၣ် ပိာ်မုၣ်ဖိအံၤဘၣ်ကဲဝဲ သုးခိၣ်ဖးဒိၣ်စီၤနဧၤမၣ်အမါအပျဲၢ်လီၤ. ပှၤလၢအိၣ်ဝးတရံးအီၤတဖၣ် မ့ၢ်တဘူၣ်ထီၣ်ဘါထီၣ်ယဟိဝၤယွၤ သနာ်က့ အဝဲဘူၣ်ထီၣ်ဘါထီၣ်ယဟိဝၤယွၤလီၤ.
စီၤနဧၤမၣ် အိၣ်ဒီးဖံးဘ့ၣ်တၢ်ဆါအၢတခါလီၤ. ဒီးအဝဲဘၣ်တူၢ်ဝဲတၢ်ဆါအံၤ နးမးလီၤ. ပှၤအံၣ်စရ့လးပိာ်မုၣ်ဖိအံၤ အဲၣ်ဒိးမၤစၢၤဝဲစီၤနဧၤမၣ်လီၤ. အဃိ အဝဲတဲဘၣ်စီၤနဧၤမၣ်အမါလၢ– ‘ယသ့ၣ်ညါပှၤလၢအမၤဘျါ နဝၤအတၢ်ဆါသ့န့ၣ် အိၣ်ဝဲတဂၤလီၤ. လၢအံၣ်စရ့လးအထံကီၢ်အပူၤန့ၣ် ယဟိဝၤယွၤအဝံအိၣ်ဝဲတဂၤလီၤ. ဝံတဂၤအံၤအမံၤမ့ၢ်ဝဲ ဝံအလံၤၡါ ဒီးအဝဲမၤဘျါက့ၤနဝၤတၢ်ဆါသ့ဝဲလီၤ.’
စီၤနဧၤမၣ်အမါတဲဘၣ်အဝၤ ဘၣ်ဃးဒီးတၢ်ဂ့ၢ်လၢ ပှၤအံၣ်စရ့လးပိာ်မုၣ်ဖိတဂၤအံၤ တဲဘၣ်အီၤန့ၣ်လီၤ. ဒ်သိးစီၤနဧၤမၣ်အတၢ်ဆါ ကဘျါက့ၤအဂီၢ် အဝဲသးအိၣ်မၤပိာ်ထွဲဝဲ ပှၤဂၤအတၢ်ဟ့ၣ်ကူၣ်ကိးမံၤဒဲးလီၤ. လၢတၢ်န့ၣ်အဃိ စီၤနဧၤမၣ်လဲၤဝဲလၢ ဝံအလံၤၡါအဟံၣ်လၢ ကီၢ်အံၣ်စရ့လးအပူၤလီၤ. စီၤနဧၤမၣ်မုၢ်လၢ်ဝဲလၢ ဝံအလံၤၡါကပာ်ဒိၣ်အီၤလီၤ. ဘၣ်ဆၣ် ဝံအလံၤၡါ ဆှၢလီၤဝဲအပျဲၢ်
တဂၤဆူ စီၤနဧၤမၣ်အအိၣ် ဒီးတဲဘၣ်အီၤလၢ– ‘လဲၤစုၣ်လီၤနသးလၢ ထံကျိယၢ်ဒ့ၣ်အပူၤနွံဘျီ ဝံၤဒီး နတၢ်ဆါကဘျါကွံာ်ဝဲလီၤ.’စီၤနဧၤမၣ်သးဟးဂီၤဝဲလီၤ. အဝဲတဲဝဲလၢ– ‘ယဆိကမိၣ်လၢ ဝံတဂၤအံၤကကိးထီၣ်အယွၤ, ဝံၢ်ဝၢ်အစုလၢယဖီခိၣ် ဒီးမၤဘျါယၤတဘျီဃီလီၤ. ဘၣ်ဆၣ် အဝဲမၢယလဲၤစုၣ်လီၤယသးလၢ ပှၤအံၣ်စရ့လးဖိအထံကျိအပူၤလီၤ. လၢကီၢ်စူၤရံအပူၤန့ၣ် ထံကျိဂ့ၤန့ၢ်ဒံးဖဲအံၤလီၤ. ယမ့ၢ်က့ၤစုၣ်လီၤယသးလၢ စူၤရံထံကျိပူၤန့ၣ်ဝံၤလီၤ.’ စီၤနဧၤမၣ်သးပှံၢ်ထီၣ်တၢ်အဃိ က့ၤဝဲလီၤ.
ဝံၤဒီးစီၤနဧၤမၣ်အပျဲၢ်တဖၣ် တဲဘၣ်အီၤလၢ– ‘နမ့ၢ်အဲၣ်ဒိးလၢ နတၢ်ဆါကဘျါက့ၤန့ၣ် နတကြၢးမၤကွၢ်တၢ်လၢ ပှၤတဲနၤဘၣ်ဧါ. တၢ်လၢဝံအလံၤၡါမၢနမၤန့ၣ် ညီညီဖိလီၤ. နမ့ၢ်မၤကွၢ်န့ၣ် တဂ့ၤဧီၤ.’ စီၤနဧၤမၣ်ဒိကနၣ်အဝဲသ့ၣ် အကလုၢ်ဒီးလဲၤစုၣ်လီၤအသးလၢ ထံကျိယၢ်ဒ့ၣ်အပူၤနွံဘျီလီၤ. ဖဲစီၤနဧၤမၣ် စုၣ်လီၤအသးပှဲၤထီၣ်နွံဘျီဝံၤဒီး ဟဲက့ၤထီၣ်လၢထံကျါအခါ အတၢ်ဆါဘျါက့ၤဝဲလီၤ. စီၤနဧၤမၣ်သးခုဝဲဒိၣ်မး ဒီးက့ၤစံးဘျုးစံးဖှိၣ်က့ၤ ဝံအလံၤၡါလီၤ. စီၤနဧၤမၣ်တဲဝဲလၢ– ‘ခဲအံၤန့ၣ် ယသ့ၣ်ညါလၢ ယဟိဝၤယွၤမ့ၢ်ယွၤလၢ အမ့ၢ်အတီတဂၤလီၤ.’ ဖဲစီၤနဧၤမၣ် အတၢ်ဆါဘျါဒီး ဟဲက့ၤတုၤလၢအဟံၣ်အခါ ပှၤအံၣ်စရ့လးပိာ်မုၣ်ဖိအံၤ ကသးခုဝဲ ဒိၣ်မးလီၤ.
“နကတဲာ်ကတီၤ တၢ်စံးထီၣ်ပတြၢၤလၢ ဖိဆံး, ဒီးဖိသၣ်အီၣ်နုၢ်ထံတဖၣ်အထးခိၣ်” လီၤ.—မးသဲ ၂၁:၁၆