Suˇriˆ mvuhˇ miˬ lehˬ Iˉsaˍreˍlaˆ mvuhˇ miˬ htaꞈ vuiˇ daꞈ jaˇ. Iˉsaˍreˍlaˆ chaw ve yaˇ miˇ ehˉ htaꞈ Suˇriꞈ maꞈ yaˇ yuˬ veu laˇ ve yoˬ. Yaˇ miˇ ehˉ yawˇ awˬ pa awˬ e htaꞈ gʼa hpaˆ daꞈ leh Neˍmanˍ maꞈ poˍ ve awˬ miˇ ma ve awˬ ceˬ gʼa te ve yoˬ. Yaˇ miˇ ehˉ awˬ paˇ awˬ kui chehˇ ve chaw Yaˬhoˉvaˬ htaꞈ oˉ kʼoˍ maˇ pui ve htawˇ, yawˇ Yaˬhoˉvaˬ htaꞈ oˉ kʼoˍ pui ve yoˬ.

Neˍmanˍ hkiˬ tuꞈ a naˍ hpehꞈ leh naˬ jaˇ. Yaˇ miˇ ehˉ yawˇ htaꞈ ga piˇ gaˇ jaˇ leh Neˍmanˍ ve awˬ miˇ ma htaꞈ kʼoˆ piˇ ve, ‘nawˬ awˬ hpawˇ htaꞈ gu gʼa ve chaw teˇ gʼaˇ htaꞈ ngaˬ shiˍ daꞈ ve yoˬ. Yawˇ iˉsaˍreˍlaˆ mvuhˇ miˬ hkʼaw chehˇ ve Eˇliˇshehˇ meh ve yoˬ. Yawˇ Yaˬhoˉvaˬ ve tcuh kaˍ paˍ hpehꞈ leh yawˇ nawˬ ve awˬ hpawˇ htaꞈ gu laˇ gʼa tuˬ yoˬ.’

Neˍmanˍ ve awˬ miˇ ma yaˇ miˇ ehˉ yawˇ htaꞈ aˬ htoꞈ ma kʼoˆ laˇ ve awˬ hpawˇ htaꞈ kʼoˆ piˇ ve yoˬ. Neˍmanˍ yawˇ ve a naˍ na˗e la tuˬ teˇ ceuˬ le le te ve yoˬ. Yawˇ Iˉsaˍreˍlaˆ mvuhˇ miˬ lo Eˇliˇshehˇ geh kʼai ve yoˬ. Neˍmanˍ chaw uiˍ teˇ gʼaˇ hpehꞈ ve pa taw, Eˇliˇshehˇ aˉ hkʼaw lo tawˆ la leh yawˇ htaꞈ haꞈ yuˬ laˇ tuˬ dawˇ  law taˍ ve yoˬ. Yaꞈ hkʼaˇ, Eˇliˇshehˇ yawˇ ve awˬ ceˬ paˍ htaꞈ kʼai tcuh leh Neˍmanˍ htaꞈ kʼoˆ piˇ ve, ‘Yawˇdanˍ iˉ kaˆ lawˬ hkʼaw nawˬ 7 pawˆ hkʼa gaˬ tuˍ keu ve kʼo na˗e la tuˬ yoˬ.’

Neˍmanˍ yawˇ nyi ma luˬ jaˇ leh kʼoˆ ve, ‘tcuh kaˍ paˍ chi teˇ gʼaˇ yawˇ ve Gʼuiˬ sha ve awˬ meh htaꞈ kuˬ ve awˬ hkʼaw lo ngaˬ htaꞈ htawˇ leh haꞈ shaˉ laˇ tuˬ ngaˬ dawˇ ve yoˬ. Yaꞈ hkʼaˇ, yawˇ ngaˬ htaꞈ Yawˇdanˍ iˉ kaˆ lawˬ hkʼaw ca tuˍ keu˗o tehꞈ kʼoˆ laˇ ve yoˬ. Suˇriˆ mvuhˇ miˬ hkʼaw ve iˉ kaˆ lawˬ Iˉsaˍreˍlaˆ mvuhˇ miˬ hkʼaw ve iˉ kaˆ lawˬ aꞈ kehˉ daꞈ jaˇ ve yoˬ. Ngaˬ iˉ kaˆ lawˬ oˇ ve teˇ hpaˍ hkʼaw ca tuˍ keu ve kʼo maˇ daꞈ hehˉ laˇ?’ Neˍmanˍ beuꞈ jaˇ leh Eˇliˇshehˇ ve yehˬ hkʼaw tawˆ kʼai ve yoˬ.

Yaꞈ hkʼaˇ, Neˍmanˍ ve awˬ ceˬ paˍ yawˇ htaꞈ shaˍ tiꞈ piˇ leh kʼoˆ ve, ‘nawˬ na˗e la tuˬ laiˉ ceuˬ te nyi gaˇ ve maˇ heˆ laˇ?’ Tcuh kaˍ paˍ te tcuh laˇ ve awˬ ceuˬ maˇ haˍ ve kʼo, nawˬ te cawˇ ve yoˬ. Neˍmanˍ awˬ ceˬ paˍ hkawˇ na yuˬ ve yoˬ. Yawˇ Yawˇdanˍ iˉ kaˆ lawˬ hkʼaw 7 pawˆ hkʼa gaˬ ca tuˍ keu leh na la ve yoˬ. Yawˇ ha lehˬ jaˇ leh Eˇliˇshehˇ htaꞈ awˬ bon uiˍ jaˇ tehꞈ kʼoˆ piˇ ve yoˬ. Neˍmanˍ kʼoˆ ve, ‘Yaˬhoˉvaˬ awˬ tehˬ awˬ na Gʼuiˬ sha hpehꞈ ve yoˬ tehꞈ chi teˇ hkui ngaˬ shiˍ peuˬ.’ Neˍmanˍ na la peuˬ ve htaꞈ Iˉsaˍreˍlaˆ chaw ve yaˇ miˇ ehˉ gʼa mawˬ htaˇ, yawˇ hkʼaˬ hkʼe dawˇ ve le?