Mwa naha ya Siria, nekunani musizana wa Muisilaele, ili yo bashemi bahae nebapila kwahule. Naakauhanyizwe kwa lubasi lwahae ki mpi ya Maasiria, mi naasebeza sina mutangaa musalaa Naamani, ili yanaali muzamaisi wa mpi . Musizana yo naalapela Jehova, kusina taba kuli batu bane bapila ni yena nebasa ezi cwalo.

Naamani naakula butuku bobumaswe bwa fa mubili, mi naautwanga butuku nako kaufela. Musizana yo naabata luli kumutusa. Abulelela musalaa Naamani kuli: ‘Kunani mutu yomuñwi yeniziba yakona kufolisa muunaa hao. Mwa Isilaele, kunani mupolofita wa Jehova yabizwa Elisha. Wakona kufolisa muunaa hao.’

Musalaa Naamani abulelela muunaa hae zanaa mutaluselize musizana. Naamani naaitukiselize kueza nto ifi kamba ifi kuli afole, kacwalo aya kwa ndu ya Elisha kwa Isilaele. Naamani naalibelela kuli Elisha naaka muamuhela sina mutu wa butokwa. Kono mwa sibaka sa kuambola ni yena ka butu, Elisha aluma mutangaa hae kuyo lumelisa  Naamani ni kumuiseza lushango lone lubulela kuli: ‘Zamaya uyo tapa mwa Nuka ya Jordani ha 7. Mi ukafola.’

Naamani naazwafile hahulu. Kihaa li: ‘Neninahana kuli mupolofita yo uka nifolisa ka kukupa ku Mulimu wahae ni kuniswala. Kono unitaluseza kuya kwa nuka ya mwa Isilaele. Lunani linuka zende mwa Siria. Kana hanikoni kuya kwateñi?’ Naamani anyema mi azwa kwa ndu ya Elisha.

Batanga bahae bamutusa kuba ni mubonelo oswanela. Kihaa bali ku yena: ‘Kana neusike waeza nto ifi kamba ifi kuli ufole? Zakubulelela mupolofita kuli ueze libunolo hahulu. Ki kabakalañi hausa ezi cwalo?’ Naamani autwa zene bamubulelezi. Aya kwa Nuka ya Jordani mi ayo nwela mwa mezi ha 7. Hasaanwezi lwabu 7, Naamani azwa mwa mezi inze afolile luli. Naaitebuhile hahulu, mi akutela ku Elisha kuyo itumela ku yena. Naamani ali: ‘Cwale naziba kuli Jehova ki yena Mulimu wa niti.’ Munahana kuli musizana wa Muisilaele naaikutwile cwañi Naamani hanaakutile inze afolile?