E piny Siria, ne nitie nyako moro matin ma ne en Nya-Israel. Siria ne ni mabor ahinya gi Israel. Jolweny mag Siria e ma nogolo nyakono thurgi, kendo koro notiyo e od jatend lweny ma ne nyinge Naman. Nyakono ne lamo Jehova kata obedo ni joma ne odakgo to ne lamo nyiseche manono.

Naman ne nigi tuo mar dhoho, kendo mano ne miyo owinjo rem ahinya. Nyako matinno ne dwaro konye. Nikech mano, ne onyiso chi Naman niya: ‘Ang’eyo ng’ato ma nyalo chango jaodi. Thurwa Israel nitie janabi mar Jehova ma nyinge Elisha. Onyalo konyo jaodi.’

Chi Naman nonyiso Naman gima nyako matinno ne owachone. Nikech Naman ne oikore timo gimoro amora mondo ochangi, ne odhi nyaka e od Elisha. Naman ne paro ni Elisha ne dhi rwake kaka jatelo. Kata kamano, Elisha to ne ooro mana ng’ato mondo e ma omi Naman ote ma ne wacho kama: ‘Dhi inyumri e Aora Jordan nyadibiriyo, kae to ibiro chango.’

 Wachno ne ok omoro Naman. Ne ong’ur kama: ‘An ne aparo ni janabini ne dhi lemona kae to achango achanga. To en onyisa mondo adhi e aora ma nitie Israel. Ma ng’at mochayo ji manadeni! Aoche ma wan-go Siria liw malich. Ka mano e gima odwaro ni atim, to kare ok adhi adhiya e aoche ma thurwa? ’ Naman ne ochwanyore, kendo ne owuok e od Elisha.

Jotij Naman nosaye mondo otim atima gima Elisha nowachono. Ne giwachone kama: ‘Donge gima duong’ en ni mondo ichangi? Gima janabini dwaro ni itimno ok en gima tek. Tim atima kaka onyisi! ’ Naman ne owinjogi. Omiyo, ne odhi e Aora Jordan mi onyumore e i pi nyadibiriyo. Ka ne otieko mar abiriyo, nochango mi dende obedo mapoth ahinya. Nomor ahinya, kendo ne odhi ir Elisha mondo ogone erokamano. Ne onyiso Elisha niya: ‘Koro to ang’eyo ni Jehova e Nyasaye madier.’ Iparo ni Nya-Israel-cha ne owinjo nade e chunye ka ne Naman ochango?