Toj txʼotxʼ te Siria, attoq jun tal txin te tnam Israel aju najchaq, moqa laqʼche, in nanqʼintoq kyiʼj toj tja. Otoq txi qʼiʼn kyuʼn soldad te Asiria, ex ok te tmajen t-xuʼjil jun nejenel kye soldad aju Naamán tbʼi. In najbʼentoq tal txin lu te Jehová, maske mintiʼtoq in che ajbʼen xjal te Jehová atz jatumel in nanqʼintoq.

Attoq jun nya bʼaʼn tyabʼ Naamán otoq tzʼok tiʼj t-xmilal ex nimxix in chyon. Tajtoq tal txin tuʼn tonin tiʼj, tuʼntzunju xi tqʼamaʼn jlu te t-xuʼjil Naamán: «Ojtzqiʼn jun xjal wuʼne aju jaku bʼanix tchmila tuʼn. Toj tnam Israel at jun tsanjel Jehová aju Eliseo tbʼi. Jaku qʼanit tchmila tuʼn».

Xi tqʼamaʼn t-xuʼjil Naamán aju otoq tzaj tqʼamaʼn tal txin te. Tajtoq tuʼn tbʼant noq alkyexku tiʼ tuʼn tuʼn tqʼanit, tuʼntzunju xiʼ toj tnam Israel atz toj tja Eliseo. Kubʼ t-ximen Naamán qa oktoq kʼeletz Eliseo kʼamolte ik tzeʼn jun xjal nim toklen. Noqtzun tuʼnj, mintiʼ etz yolel tukʼil, oʼkx jun tmajen etz tsamaʼn kʼamolte ex tuʼn t-xi tqʼoʼn tqanil lu te: «Txiʼya ex  kuʼxa wuq maj toj nim aʼ Jordán. Iktzun tten kbʼantela».

Nya bʼaʼn ela jlu toj twitz Naamán ex tqʼama: «Kubʼ nximane qa aju tsanjel Dios lu oktoq chin kbʼel tqʼanine aj t-xi tqanen onbʼil te Tdios ex aj t-xi tyuken tqʼabʼ toj jun tbʼanelxix tten. Noqtzun tuʼnj, oʼkx ma tzaj tqʼamaʼn weye tuʼn nxiʼye toj nim aʼ at toj Israel. Mas tbʼanel qe nim aʼ ateʼ toj tnam Siria. ¿Tiquʼn mlay chinxe kyoj nim aʼ lu?». Tzaj nimxix tqʼoj Naamán ex ikʼ bʼet tja Eliseo.

E onin qe tmajen Naamán tiʼj tuʼn tkubʼ tenxix ximel tiʼj jlu. Ex xi kyqʼamaʼn te: «¿Jaku bʼant alkyexku tiʼ tuʼna tuʼn tbʼanixa? Nya kwest aju in tzaj tqanin tsanjel Dios teya. ¿Tiquʼn miʼn kubʼ tbʼinchaʼna?». Xi tbʼiʼn Naamán kyyol, tuʼntzunju, xiʼ toj nimaʼ Jordán ex kuʼx wuq maj toj aʼ. Toj twuqin maj, tej tjatz Naamán toj aʼ otoq bʼanix. In tzalajxix ex aj meltzʼaj tuʼn t-xi tqʼoʼn chjonte te Eliseo. Xi tqʼamaʼn: «Jaʼlo ma tzʼel nnikʼe tiʼj qa a Jehová aju axix tok Dios». Aj meltzʼaj Naamán tja otoq bʼanix. ¿Tiʼtzulo kubʼ tnaʼn tal txin aj Israel tej tok tkeʼyin?