Jam Siria, yajmëjäjty tuˈugë kixyuˈunk diˈib israelitë, jagamë nety ja jyëën tyëjk të wyeˈemy ets ja fyamilyë. Yëˈë nety të myatsëdë ja soldäädëtëjk diˈib Siria, ets yëˈë net ojts tyuumbëˈäjtënë ja kyudëjkë Naamán, niduˈuk diˈib tuump soldäädë wintsën. Tyäˈädë kixyuˈunk duˈunyëm tˈawdäjtyë Jyobaa, oy ja jäˈäy duˈun tkatuundë.

Naamán yëˈë nety myëdäjtypy tuˈugë axëkpäˈäm mä nyiniˈkx diˈib nëgooyë pyëjknë. Ets ja kixyuˈunk pyudëkëyaambyë nety ja Naamán, pääty tˈanmääy ja wyindäj: “Nˈixyˈajtypyëts tuˈugë jäˈäy diˈib mbäät yaˈˈagëdaˈagyëtyë nwintsënëts. Tam tuˈugë Jyobaa kyugajpxy Israel diˈib xyëwˈäjtypy Eliseo ets mbäät yëˈë yaˈˈagëdaˈagyëty”.

Ta ja Naamán tyukmëtmaytyakë ja kyudëjk wiˈixë nety ja kixyuˈunk të yˈanëˈëmxëty. Yëˈë tyunaambyë nety oytyim tiijëty nëgooko yˈagëdaˈaky, pääty ojts nyijkxy Israel mä tsyëënë ja Eliseo. Naamán wyinmääy ko ja Eliseo duˈun yˈaxäjëyaˈanyëty extëm tuˈugë jäˈäy diˈib mëj ijtp. Per ja Eliseo kyaj nyibëtsëëmë, yëˈë kyajx ja tyuumbë parë duˈun tˈanëëmëdë  Naamán: “Nëjkx ets jëxtujkˈok mdëkët mä Jordán mëjnëë. Net mˈagëdäˈägët”.

Naamán kyaj tˈoymyëdooy extëm yaˈˈanmääy, ta jyënany: “Duˈunëtsë nety nwinmay ko tadë kugajpxy yëˈë myëgajpxaambyë Dyios parëts xyyaˈˈagëdäˈägët ets ko jeˈeyëtsë kyëˈë xytyuknikonäˈäny. Per jeˈeyëtsëgaˈa të xyˈanmaaybyë parëts nëjkx ntsiˈiy mä nëë diˈib Israel. Mas oyatyë nëë jam Siria. Jamxyëbëtsën nëjkx ntsiˈiy”. Naamán ta jyotˈambëjky ets ta tsyoˈony mä tyëjkë Eliseo.

Ta ja tyuumbëtëjkë Naamán pyudëjkëdë parë yajxon tijaty twinmayët. Yˈanmääyëdë: “¿Ti kyaj xytyunäˈäny oytyim tiijëty parë mˈagëdäˈägët? Kyaj myëjwiin kyajaaty diˈib mˈamdoowëbë tyäˈädë kugajpxy. ¿Tiko duˈun xykyatuny?”. Naamán ta duˈun ttuuny, ojts nyijkxy mä ja Jordán mëjnëë ets jap tyëjkë jëxtujkˈok. Ko pyëtsëëmy mä ja myëjëxtujkˈokpë, ta tˈijxy ko të nety yˈagëdaktäˈäy. Agujk jotkujk nyayjäˈäwë ets ta jyëmbijty mä Eliseo parë tmoˈoyaˈanyë dyoskujuyëm. Ta tˈanmääy: “Tyam, nijäˈäwëbëtsë net ko Jyobaa yëˈë Diosë tëyˈäjtënbë”. Naamán ta jyëmbijty mä tyëjk, per të nety yˈagëdaˈaky. ¿Wiˈixëdaa nyayjäˈäwë ja kixyuˈunk ko duˈun tˈijxy?