Umu mpanga iya Silya, mwali akakazyana Akina Izlaeli akikalanga ukutali na avyazi. Akakazyana kaa kafumile uku lupwa lino asilika Aina Asilya yakasenzile nupya katandike ukuombela umuci wakwe Naamani umukalamba wa yasilika. Akakazyana kaa kapepanga Yeova, nanti cakuti antu aakazingulwike yatapepanga Leza uwa cumi.

Naamani walwile ulwale uwipisye uwa ku nkanda, nupya wawaikwanga lyonsi. Kakazyana kalondesyanga ukumwazwilizya. Kaneenyile umuci wakwe Naamani ikati: ‘Namanya umwi aangapozya ya winu. Umu Izlaeli mwaya kasesema wakwe Yeova uwi izina lyakuti Elisya. Nupya angapozya ya winu.’

Umuci wakwe Naamani waneenyile iya vino akakazyana kamuneenyile. Waipeelisye ukucita icili consi, fwandi waile uku ng’anda yakwe Elisya uku Izlaeli. Naamani wenekelanga ukuti Elisya amamupokelela wa muntu umucindame. Nomba  umucifulo ca kulanda nawe umukulungatika, Elisya watumile umuomvi wakwe ukuya umu kumupokelela nu kumuneena ati: ‘Yanga kafulale imiku 7 umu Luzi Lwa Yodani. Lyene umapola.’

Naamani ataatemilwe vino yamuneenyile. Watile: ‘Inkwelenganya ukuti kasesema wii amampozya ukupitila mukulenga kuli Leza wakwe nu kwika makasa yakwe pali nene. Nomba, ataanena ukuyafulala umu luzi ulwa mu Izlaeli. Twakwata inguzi izisuma sana umu Silya. I cani cino ntanga nkafulalile uku nguzi zya ku Silya kwene?’ Naamani wasosile afuma na pa ng’anda yakwe Elisya.

Aomvi yakwe Naamani yamwazwilizye ukwelenganyapo sana. Yatiile: ‘Uzye mutanga mucite icili consi pakuti mupole? Cino kasesema ataamunena ukucita, i cintu icangupale sana. I cani cino mutanga mucite sile vino atamuneena?’ Naamani uvwile vino yamuneenyile. Waile atuwila umu Luzi Lwa Yodani imiku 7. Pa cisila ca kutuwila umuku walenga 7, Naamani wapozile. Uvwile ningo sana nupya waile umukutaizya Elisya. Naamani watile: ‘Lyene namanya ukuti Yeova aali Leza uwa cumi.’ Uzye ukwelenganya ukuti akakazyana kuvwile uli lino Naamani wawezile uku ng’anda ala watapola?