မိန်းကလေး​တစ်ယောက် အစ္စရေး​ပြည်​က​နေ ဆီးရီးယား​ပြည်​ကို ရောက်နေ​တ​ယ်။ ဆီးရီးယားစစ်တပ်က သူ့ကို ဖမ်း​ခေါ်သွား​လို့ အခု ဗိုလ်ချုပ်​နေမန်​အိမ်​မှာ သူ့​ဇနီးရဲ့ အစေခံမလေး ဖြစ်နေ​တာ။ ယေဟောဝါကို တခြား​လူတွေ မကိုးကွယ်​ပေ​မဲ့ သူက​တော့ ယေဟောဝါကိုပဲ ဆက်​ကိုးကွယ်​တ​ယ်။

နေမန်​ဟာ ရွံ​စရာ​ကောင်းတဲ့ အရေပြား​ရောဂါ​ကြောင့် တစ်ချိန်လုံး နာကျင်​နေ​ရှာ​တ​ယ်။ မိန်းကလေး​က သူ့ကို တကယ်ပဲ ကူညီပေး​ချင်​တာ။ ဒါနဲ့ နေမန်​ရဲ့ ဇနီးကို ‘သခင်မ​ရဲ့ ခင်ပွန်း ပြန်ကောင်း​သွား​အောင် လုပ်ပေး​နိုင်တဲ့​သူ​ကို ကျွန်မ​သိတယ်။ အစ္စရေး​ပြည်​မှာ ယေဟောဝါရဲ့ ပရောဖက် ဧလိရှဲ ရှိတယ်။ သူက သခင့်​ကို ကုသ​ပေး​နိုင်တယ်’ လို့ပြောတယ်။

နေမန်​ရဲ့​ဇနီးက မိန်းကလေး​ပြောတာကို ပြန်​ပြောပြတယ်။ နေမန်​ဟာ ရောဂါ​ပျောက်​ချင်​လို့ အစ္စရေး​ပြည်​က ဧလိရှဲ​အိမ်​ကို သွားတယ်။ ဧလိရှဲ​ဟာ သူ့ကို အရေးပါ​သူ​အဖြစ် ကြိုဆို​မှာပဲလို့ တွေး​ထားတာ။ ဒါပေမဲ့ ဧလိရှဲ​နဲ့ တိုက်ရိုက်​မ​တွေ့ရ​ဘဲ သူက လူ​လွှတ်​ပြီး ‘ဂျော်ဒန်​မြစ်​ကို​သွား၊ ခုနစ်ကြိမ် ရေချိုး​လိုက်။ ပျောက်​သွား​လိမ့်မယ်’ လို့ စကား​ပါး​လိုက်တယ်။

 နေမန် တော်တော် စိတ်ပျက်သွားပြီး ‘ဒီပရောဖက်​က သူ့​ဘုရားနာမည်​ခေါ်၊ ငါ့ပေါ်လက်တင်​ပေးပြီး ကုပေး​မယ်လို့​ထင်တာ။ အခုတော့ အစ္စရေး​ပြည်​က ဒီမြစ်ကို သွားခိုင်းတယ်။ ငါ​တို့ ဆီးရီးယားပြည်မှာ ဒီထက်ကောင်းတဲ့ မြစ်တွေ အများကြီး။ ဘာလို့ဒီမြစ်ကို သွားရမှာလဲ’ လို့​ပြောပြီး စိတ်ဆိုးဆိုးနဲ့ ဧလိရှဲအိမ်ကနေ ထွက်​လာတယ်။

နေမန်​ရဲ့ နောက်လိုက်​တွေ​က သူ့ကို ဒီလို ဖျောင်းဖျ​တ​ယ်– ‘ရောဂါ​မ​ပျောက်​ချင်ဘူးလား။ ဒီပရောဖက်​ပြောလိုက်​တာ​က ရိုးရိုးလေး​ပါ။ ဘာ​လို့ မလုပ်​နိုင်​ရမှာ​လဲ’ တဲ့။ နေမန်​လည်း သူတို့​ပြောတာ လက်ခံပြီး ဂျော်ဒန်​မြစ်​ကို သွားတယ်။ ခုနစ်ကြိမ် ရေချိုးလိုက်တယ်။ ခုနစ်ကြိမ်​မြောက် ရေ​ထဲက ထ​လာတဲ့အခါ နေမန်​ရဲ့​ရောဂါ လုံးဝ​ပျောက်​သွားတယ်။ တော်တော်လေး ကျေးဇူးတင်​ပြီး ဧလိရှဲဆီ ပြန်သွား​တ​ယ်။ ‘ယေဟောဝါဟာ စစ်မှန်တဲ့​ဘုရား​ဖြစ်မှန်း အခု ကျွန်တော် သိ​ပါ​ပြီ’ လို့ နေမန်​ပြောတယ်။ နေမန် ရောဂါ​ပျောက်ကင်း​သွားပြီး ပြန်လာတဲ့​အခါ အစ္စရေးမိန်းကလေး ဘယ်လို​ခံစားရမယ် ထင်သလဲ။