Ipan tlali Siria itstoya se siuapil israelejketl. Ichaj tlauel uejka mokauayaya uan amo itstoya ininuaya ichampoyouaj. Tlateuianij kiuikakej Siria, uan nopaya kitekipanouayaya isiua se tlakatl katli kinyakanayaya tlateuianij. Nopa tlakatl motokaxtiyaya Naamán. Maske ipan tlali Siria amo kiueyichiuayayaj Jehová, nopa siuapil kena kiueyichiuayaya.

Naamán kipixtoya se kokolistli tlen kiiljuiaj lepra, uan tlauel kikokouayaya. Nopa siuapil kinekiyaya kipaleuis, yeka kiiljuik Naamán isiua: “Nikixmati se tlakatl tlen uelis kipaleuis moueue. Ipan altepetl Israel itstok se Jehová itlajtolpanextijka tlen itoka Eliseo, uan uelis kichikauas moueue”.

Nopa siuatl kiiljuik iueue tlen kiiljuijtoya nopa siuapil. Naamán kinekiyaya mochikauas, yeka kiitato Eliseo ipan altepetl Israel. Maske Naamán moiljuiyaya Eliseo kuali kiseliskia pampa ya eliyaya se  tlayakanketl, san kititlanki se itekipanojka ma kiseliti uan ma kiiljui: “Xia ueyatl Jordán uan chikompa xikalaki. Kiampa timochikauas”.

Naamán kualanki uan kiijtok: “Na nimoiljuiyaya ni tlajtolpanextijketl kiojoliniskia ima, kitsajtsiliskia iTeotsij uan nechchikauaskia. Uan san nechiljuik ma nia ipan nopa ueyatl. Tlauel kuali nopa ueyatl tlen onka ne Siria uan amo kej nikaj ipan Israel, ¿kenke amo nechtitlanki ipan nopa ueyatl tlen onka ipan Siria?”. Naamán tlauel kualanki uan kistejki.

Naamán itekipanojkauaj kipaleuijkej ma motlalnamikti. Kiiljuijkej: “¿Tijneki timochikauas? Amo ouij tlen nopa tlajtolpanextijketl mitsiljuik xijchiua. ¿Kenke amo tijneki tijchiuas?”. Naamán kintlakakilik, yajki ipan ueyatl Jordán uan chikompa kalajki. Kema ika chikompa kalajki, mochikajki. Naamán tlauel yolpakiyaya, yeka sampa kiitato Eliseo pampa kinekiyaya kitlaskamatilis. Kiiljuik: “Nama nijmati Jehová yaya toTeotsij katli melauak”. Naamán ayokmo mokokouayaya kema tlakuepilik ichaj. ¿Kenijkatsa timoiljuia momachilik nopa siuapil kema kiitak Naamán?