Moshilongo Siria, omwa li okakadhona kamwe Okaisraeli, hoka ka li kokule negumbo lyaandjawo. Okakadhona hoka oka kwatwa po ketangakwiita lyaSiria. Oka ningi okapika komukulukadhi gwaNaeman, ondjayi yetangakwiita. Oka li haka longele Jehova, nonando aantu mboka ka li mokati kawo ihaye shi ningi.

Naeman okwa li e na omukithi gwoshilundu, nokwa kala te ehama ethimbo alihe. Okakadhona Okaisraeli oka li ka hala a aluka. Oka lombwele omukulukadhi gwaNaeman ka ti: ‘Ondi shi omuntu ngoka ta vulu okwaaludha omusamane gwoye. MuIsraeli omu na omupolofeti gwaJehova edhina lye Elisa. Ota vulu okwaaludha omusamane gwoye.’

Omukulukadhi okwa lombwele omulume shoka okakadhona ka ti. Naeman okwa li a hala okwaaluka, onkee okwa yi kegumbo lyaElisa kuIsraeli. Naeman okwa li a tegelela Elisa u ungaunge naye ngaashi aasimanekwa haya ningilwa. Elisa okwa ningi po shike? Pehala lyokupoya naNaeman mwene, Elisa okwa tumu omupiya gwe a ka popye naNaeman. Omupiya okwe mu lombwele a ti: ‘Inda wu ki iyoge luheyali momulonga  gwaJordan, noto ka aluka kuuvu woye.’

Naeman okwa li a geya nayi sho a lombwelwa e ki iyoge momulonga. Okwa ti: ‘Onda li ndi shi omupolofeti nguka ota aludha ndje ta galikana kuKalunga ke, ye ta fungafunga oshikaha she kombanda yandje. Ihe ota lombwele ndje ndi ye komulonga nguka gu li muIsraeli. MuSiria omu na omilonga ominene. Omolwashike itaandi yi owala ndi ki iyoge hoka?’ Naeman okwa geye unene, e ta zi mo megumbo lyaElisa.

Aapiya yaNaeman oya li ye mu kwathele a dhiladhile nawa. Oye mu lombwele ya ti: ‘Mbela ito ka ninga kehe shimwe opo wu aluke? Shoka wa lombwelwa wu ninge komupolofeti nguka oshinima oshipu. Omolwashike itoo shi ningi owala?’ Naeman okwa pulakene kuyo. Okwa yi komulonga gwaJordan e ta ningine momeya lwiikando iheyali. Konima yoshikando oshitiheyali, Naeman okwa zi mo momulonga a aluka. Okwa li a nyanyukwa shili, nokwa shuna a ka pandule Elisa. Naeman okwa ti: ‘Ngashingeyi ondi shi shi kutya Jehova oye Kalunga kashili.’ Mbela sho to tala okakadhona Okaisraeli oka li ku uvite ngiini, sho Naeman a galuka a aluka?