Ipan Siria nemiya se ichpokatsin israelita akin uejka nemiya itech ichan. Soldados sirios okixelojkej itech ichanejkauan niman aman yejua itlakeual katka isiuauj Naamán, akin kinyekanaya soldados sirios. Ichpokatsin kiueyichiuaya Jehová maski akin ompa chantiyaj xkichiuayaj.

Naamán kipiaya se xkuajli kokolistli ipan itlalnakayo tlen melak tekoko. Ichpokatsin kinekiya kipaleuis. Kuakon okijli isiuauj Naamán: “Nikixmati yakaj akin uelis kichiuas ika moueuentsin kuajli manomachili. Ipan Israel, nemi se iteotlajtokauj Jehová akin itoka Eliseo. Yejua uelis kipajtis moueuentsin”.

Isiuauj Naamán okijli iueuentsin tlen okijlika ichpokatsin. Naamán kichiuaskia maski san tlenon niman ijkon pajtis. Kuakon yejua oyaj Israel kampa chantiya Eliseo. Naamán kichiaya ika Eliseo makiseli ken se akin ueyixtok. San ika, yejua nion xokis, Eliseo okititlan itlakeual makiseli niman makijli Naamán yejuin tlajtoltin:  “Xmaltiti chikometipan ipan atentli Jordán. Kuakon tipajtis”.

Naamán xokuelkak yejon, okijto: “Oniknemili ika yejuin teotlajtoketl nechpajtiskia ijkuak kinotsaskia iTajtsin niman ika kichiuaskia tlen temojkatlachialti. Niman san tlen onechijli, ika maniuiya itech yejon atentli tlen onka Israel. Tikinpiyaj melak kualtsitsintin atentin ipan Siria. ¿Xuelis nias ipan yejon atentin?”. Naamán melak okualan niman okitlalkauijteuj ichan Eliseo.

Itlakeualuan Naamán okipaleuijkej kuajli matlanemili. Yejuamej okijlikej: “Tikchiuaskia maski san tlenon niman ijkon tipajtis, ¿xmelak? Tlen teotlajtoketl mitstlajtlanilia xouijtika. ¿Tleka xtikchiua?”. Naamán okinkak, kuakon oyaj ipan atentli Jordán niman chikometipan okalak ijtik atl. Ijkuak ika chikometipan okichiuj yejon, ¡opopoliuj ikokolis! Yejua melak opak niman okitlasojkamachilito Eliseo. Naamán okijli: “Aman nikmatstika ika Jehová yejua toTajtsin akin melauak”. Ijkuak Naamán onokuep ichan xok kualouaya, ¿kenon tiknemilia onomachili ichpokatsin israelita ijkuak okitak?