Go be go na le ngwanenyana yo mongwe yo monyenyane nageng ya Siria. Ngwanenyana yoo o be a le kgole le gagabo. O be a tšerwe nageng ya gabo ke mašole a Baasiria, gomme gona bjale o be a šomela mosadi wa Naamane, yoo e bego e le molaodi wa mašole a Siria. Ngwanenyana yoo o be a rapela Jehofa gaešita le ge batho bao a bego a phela le bona ba be ba sa mo rapele.

Naamane o be a na le bolwetši bja go tšhoša bja letlalo, bjoo bo bego bo mo kweša bohloko. Ngwanenyana yoo o be a nyaka go mo thuša. O ile a botša mosadi wa Naamane a re: ‘Go na le motho yo ke mo tsebago yo a ka fodišago monna wa gago. Kua Isiraele, go na le moporofeta wa Jehofa yo a bitšwago Elisha. A ka fodiša monna wa gago.’

Mosadi wa Naamane o ile a botša Naamane seo ngwanenyana yoo a mmoditšego sona. Naamane o be a ka dira selo se sengwe le se sengwe gore a fole, ka gona o ile a ya ntlong ya Elisha kua Isiraele. Naamane o be a nyaka gore Elisha a tle a mo sware bjalo ka motho wa maemo. Eupša go e na le gore Elisha a ye a bolele le Naamane, o ile a romela mohlanka wa  gagwe gore a yo dumediša Naamane le go mmotša molaetša wo o rego: ‘Sepela o yo hlapa gašupa Nokeng ya Jorodane, ke moka o tla fola.’

Naamane o ile a kwata gomme a re: ‘Ke be ke nagana gore moporofetanyana yo o tla mphodiša ka go bitša leina la Modimo wa gagwe le go iša seatla sa gagwe kua le kua mmeleng wa ka. Go e na le moo, o mpotša gore ke yo hlapa nokeng ya go se re selo ya mo Isiraele. Kua Siria re na le dinoka tša go phala tša mo Isiraele. Go re’ng a sa fo re ke yo hlapa go e nngwe ya tšona?’ Naamane o ile a galefa gomme a tloga ntlong ya Elisha.

Bahlanka ba Naamane ba ile ba mo thuša gore a nagane gabotse. Ba ile ba re go yena: ‘Na o ka se dire selo se sengwe le se sengwe gore o fole? Seo moporofeta yo a rego o se dire ga se boima. Dira seo a rego o se dire.’ Naamane o ile a ba theetša. O ile a ya Nokeng ya Jorodane gomme a phonkgela ka go yona gašupa. Ka morago ga go phonkgela ka lekga la bošupa, o ile a tšwa a fodile. O ile a thaba kudu, gomme a boela morago gore a yo leboga Elisha. O ile a fihla a re: ‘Bjale ke a tseba gore Jehofa ke Modimo wa nnete.’ O nagana gore ngwanenyana yola wa Moisiraele o ile a ikwa bjang ge a bona Naamane a boa gae a fodile?