Síriya kéyahdi atʼééd yázhí Ízrel dineʼé nilı̨́įgo bidineʼé yitsʼą́ądi naaghá. Éí Síriya binaatʼáanii beʼasdzą́ą́ bá nijilʼaʼ. Díí atʼééd yázhí azhą́ binaagóó kéédahatʼínígíí doo Jiihóvah deidósin da ndi, bí éí Jiihóvah yidósin.

Néíyaman éí łóód doo nádziihii bee hąąh dahazʼą́, áko tʼáá áłahjįʼ bikʼee hoł nahonigaah. Díí atʼééd yázhí áká adeeshwoł nízin. Áko Néíyaman beʼasdzą́ą́ ííłní: ‘Ízreldi Jiihóvah yá halneʼii Iiláísha wolyé, éí nahastiin néidoołzihgo átʼé.’

Néíyaman beʼasdzą́ą́ éí atʼééd yázhí ánínígíí Néíyaman bee bił hojoolneʼ. Néíyaman éí tʼáá ałtsoní bidínéeshtah nízingo Ízreldi Iiláísha bighangóó jiníyá. Diné ílíinii nishłı̨́ jinízin áádóó Iiláísha tʼáá bí shichʼįʼ hadoodzih jinízin. Ńtʼééʼ Iiláísha éí bá naalʼaʼí hadááh yiníłʼaʼgo kótʼéego hoł hólneʼ: ‘Bee naa dahazʼánígíí nídoodzihgo, Jórdan tooh nílı̨́įdi tsostsʼidi táʼádidíígis.’

 Néíyaman hoł hóóneʼígíí doo hoł yáʼátʼéeh da. ‘Jiihóvah yá halneʼii shikʼi dah nidilniihgo God yichʼįʼ ádidooniił nisin. Ńtʼééʼ tooh nílı̨́ı̨́góó dínááh shijiní. Síriyadi éí tooh danílínígíí yáʼádaatʼééh, áko áajigo daatsʼí deeshááł,’ jidííniid. Néíyaman doo hoł hózhǫǫd da, áko Iiláísha bighandę́ę́ʼ dah nízhdiidzá.

Néíyaman bá ndaalʼaʼí ádabiłní: ‘Shą́ą́ʼ tʼáá ałtsoní bidínéeshtah diníineʼ. God yá halneʼii áníłnínígíí bikʼehgóó íinidzaago tʼáadoo átʼéhída.’ Ádaanínígíí bikʼehgo Néíyaman éí Jórdan tooh nílı̨́ı̨́góó jiníyá áádóó tsostsʼidi táʼázdeezgiz. Tsostsʼid góneʼ táʼázdeezgiz bikéédóó tó biiʼdę́ę́ʼ hajííyáago, łóód yę́ę hąąh ásdįįd. Díí tʼáá íiyisíí baa ahééh jiniizı̨́ı̨́ʼ, áko Iiláísha bighangóó níjídzáago ahéheeʼ bizhdííniid. Néíyaman ájíní: ‘Kʼad shił bééhoozin. Jiihóvah tʼéí tʼáá aaníigo Diyin nilı̨́.’ Atʼééd yázhí Néíyaman náádzíʼígíí jiiłtsą́ągo haajiidzaa?