Omukainthu umwe omu Isilayeli ankho ukala ko Silia, kokule unene neumbo liae. Watualua kotyilongo tyikala kokule nombunga yae nomafualali o Silia, akakala omupika womukai wonkhalamutue yomafualali itiwa o Naama. Omukainthu oo ankho umbila Jeova, namphila ovanthu ovakuavo vehetyilingi.

Naama ankho una ouvela umwe umuihama unene. Iya omukainthu ankho uhanda okumukuatesako. Atolela omukai wa Naama okuti: ‘Ame ndyii omunthu umwe upondola okuhakula omulume wove. Ko Isilayeli, kuna omuuli wa Jeova utiwa o Eliseu. Upondola okuhakula omulume wove.’

Omukai wa Naama akatolela Naama etyi apopilwa nomukainthu. Iya Naama ankho uhanda okulinga atyiho opo aveluke, aende keumbo lia Eliseu ko Isilayeli. Naama ankho ukevelela Eliseu emutambule monkhalelo yelikalela. Mahi Eliseu eheya okupopia nae atumu omuundapi wae akapopile Naama okuti: ‘Enda Kenyana  Jordau onyingila ine lindambuika ovikando epandu-vali momaande. Inkha ulinga ngotyo moveluka.’

Naama anumana unene. Apopi okuti: ‘Ame ankho nasoka okuti omuuli manthyakula putyina apopia na Huku yae otyo aviva omakuoko. Unthuma ndyende kondongi yo mo Isilayeli. Ko Silia kuna onondongi mbukahi vali nawa. Omokonda yatyi ahanthumine kondongi yo Silia? Naama anumana unene, atundu meumbo lia Eliseu.

Ovaundapi va Naama avemukuatesako okusoka monkhalelo ikahi vali nawa. Evepopila okuti: ‘Ove kuhande okulinga atyiho opo uhakuke? Etyi omuuli ekupopila ulinge katyalemene. Omokonda yatyi uhetyilingila vala?’ Naama evetehelela nawa. Aende Kenyana Jordau anyingila momaande ovikando epandu-vali. Konyima yotyikando tya pandu-vali, etyi Naama atunda momeva amono okuti waveluka. Ahambukwa unene, akondoka opo akapandule Eliseu. Naama apopi okuti: ‘Pahe ndyityii okuti Jeova o Huku yotyotyili.’ Soka oñgeni omukainthu omu Isilayeli elitehelela, etyi amona Naama wakondoka waveluka?