Omu nsi ya Siria, hakaba hariyo omwishiki Omwisraeli muto owaabaire ari hare n’owaabo. Amahe ga Siria gakamwiha owaabo, kandi akaba omuheereza w’omukazi wa mukuru w’amahe orikwetwa Naamani. Omwishiki muto ogwo akaba naaheereza Yehova, n’obu abantu abaabaire bamwetoroire baabaire batarikuramya Yehova.

Naamani akaba aine endwara y’amaani, kandi akaba aine obusaasi bwingi. Omwishiki muto ogwo buzima akaba naayenda kumuhwera. Akagambira muka Naamani ati: ‘Nimmanya orikubaasa kutambira baro. Omuri Israeli, hariyo nabi wa Yehova orikwetwa Elisa. Naabaasa kutambira baro.’

Muka Naamani akagambira iba ebi omwishiki muto yaagambire. Akaikiriza kukora buri kimwe, n’ahabw’ekyo akaza owa Elisa omuri Israeli. Naamani akaba naamanya ngu Elisa naija kumwakiira nk’omuntu w’ekitiinisa. Kwonka omu mwanya gwa Elisa kuba niwe yaagamba na Naamani, akoohereza abaheereza be kuba nibo  baamuramutsya kandi bakamuha n’obutumwa obu: ‘Gyenda onaabe emirundi mushanju omu Mugyera Yorudani. Noija kukira.’

Ekyo kikagwisa kubi Naamani. Akagira ati: ‘Mbaire ningira ngu naija kushohora ayeta eiziina rya Yehova Ruhanga we kandi ansisirira aha rwaire antambire ebibembe. Kwonka, yaangira ngu nze omu mugyera omuri Israeli. Twine emigyera mirungi omuri Siria. Ahabw’enki ntari kuba niyo naaza?’ Naamani akagira ekiniga, yaaruga omu nju ya Elisa.

Abaheereza ba Naamani bakamuhwera kugira emiteekateekyere mirungi. Bakamugira bati: ‘Kuri nabi ogu yaakuragiira ekintu kihango t’okukikozire? Eki nabi yaakugira ngu okore tikigumire. Ahabw’enki otarikukikora?’ Naamani akabahurikiriza. Akaza aha Mugyera Yorudani yaayejabika omu maizi emirundi mushanju. Aha murundi gwa mushanju, Naamani akaruga omu maizi akizire. Akashemererwa munonga, kandi akagaruka owa Elisa kumusiima. Naamani akagira ati: ‘Hati naamanya ngu Yehova ni Ruhanga ow’amazima.’ Nooteekateeka ngu omwishiki Omwisraeli muto akeehurira ata Naamani ku yaagarukire akizire?