Bɛvale Yizilayɛnli kakula raalɛ ekyi bie bɛhɔle Selea maanle nu. Ɛnee ɛkɛ ne ɛmbikye ye sua zo fee. Selea sogyama vale ye vile ye awovolɛ anwo na kɛkala, ɔle sogya kpanyinli Neeman aye ne sonvolɛ. Kakula ekyi ne sonle Gyihova noko menli mɔɔ ɔ nee bɛ de la ɛnzonle ye.

Ewule ɛzulolɛ bie guale Neeman anwo ɔmaanle ɔdele nyane dahuu. Ɛnee kakula raalɛ ekyi ne kpondɛ kɛ ɔboa ye. Ɔhanle ɔhilele Neeman aye ne kɛ: ‘Meze awie mɔɔ bahola ayɛ ɛ hu ayile a. Gyihova ngapezonli bie wɔ Yizilayɛ, bɛfɛlɛ ye Yilaehya. Ɔbahola yeayɛ ɛ hu ayile.’

Neeman aye ne hanle mɔɔ kakula raalɛ ne hanle la hilele ɔ hu. Neeman liele dole nu na ɔhɔnwunle Yilaehya wɔ Yizilayɛ. Ɛnee Neeman anye la kɛ Yilaehya balie ye kɛ sonla kpole bie la. Noko Yilaehya zoanle ye sonvolɛ ne maanle ɔhɔyiale Neeman na ɔzele ye kɛ: ‘Kɔbia Azule Dwɔdan ne anu fane nsuu na ɛbade kpɔkɛ.’

 Neeman arɛle bɔle na ɔhanle kɛ: ‘Ɛnee medwenle kɛ ngapezonli ne bavɛlɛ ye Nyamenle ne, na yeava ɔ sa yeawɔza me ewule ne azo yeayɛ me ayile. Noko ɔse mengɔmbia azule ɛhye mɔɔ wɔ Yizilayɛ la anu. Yɛlɛ azule mgbalɛ wɔ Selea. Duzu ati a mengɔmbia bie ɛ?’ Neeman vale ɛya na ɔvile Yilaehya sua nu ɛkɛ.

Neeman sonvolɛma ne boale ye maanle ɔdwenle edwɛkɛ ne anwo. Bɛbizale ye kɛ: ‘Saa ɔhanle kɛ ɛyɛ debie ɛsesebɛ bie a, anrɛɛ ɛnrɛyɛ ɔ? Mɔɔ ngapezonli ne se ɛyɛ la ɛnyɛ se. Duzu ati a ɛnrɛhɔdɔ azule ne anu a?’ Neeman diele bɛ. Ɔhɔdɔle Azule Dwɔdan ne anu fane nsuu. Mɔɔ Neeman wiele la, akee ɔdele kpɔkɛ bɔkɔɔ. Ɔ nye liele kpole na ɔhɔyɛle Yilaehya mo. Neeman hanle kɛ: ‘Kɛkala, menwu kɛ Gyihova a le nɔhalɛ Nyamenle ne a.’ Mɔɔ Neeman rale sua nu mɔɔ ɛnee yede kpɔkɛ la, ɛnea a kɛzi Yizilayɛnli kakula raalɛ ne dele nganeɛ ɛ?