Siria llajtapimi shuj israelita huahua causarca. Paipaj huasimanta, familiamantapish carupimi carca. Sirio soldadocunami paitaca apashca carca. Cunanca soldadocunata mandaj Naamanpaj huarmita sirvijmi carca. Chai siriocuna Jehová Diosta mana adorajpipish paica Jehovatami adoraj carca.

Naamanca millai ungüihuan cashcamantami paipaj aichataca yallitaj nanachij carca. Chai huahuaca ayudanatami munarca. Chaimantami Naamanpaj huarmimanca, ‘cambaj cusata alliyachichunmi shuj runata rijsini. Israelpimi Jehovapaj shuj profeta tiyan. Paipaj shutica Eliseomi can. Paimi alliyachinga’ nirca.

Chaimantami paica uchilla huahua ima nishcata paipaj cusaman huillarca. Naamanca, ‘jambiringapajca ñucaca imatapish rurashallami’ nijmi carca. Chaimi Israelpi causaj Eliseopajman rirca. Paica reyta shinami ñucataca chasquinga nishpami yuyarca. Ashtahuanpish Eliseoca pai rinapaj randica paita sirvij runatami  Naamanpajman cacharca. Sirvij runaca, ‘Jordán yacuman rishpa canchis cutin armagri. Chaipimi alli tucungui’ nishpami huillarca.

Chashna nijpica pꞌiñarishpami Naamanca, ‘ñucaca paitaj llujshishpa paipaj Diosta mañashpa, paipaj maquita churashpa alliyachinga nishpami yuyarcani. Ashtahuanpish Israelpi tiyaj yacumanmari cachashca. Siriapimi ashtahuan alli yacucunata charinchij. ¿Manachu chai yacupi armagri tucuni?’ nishpami Eliseopaj huasimanta rirca.

Naamanta sirvijcunaca pai alli yuyachunmi ayudarcacuna. Paicunaca, ‘jambiringapajca imatapish ruranguimanmi ¿nachu? Chai profeta rurachun mandashcaca mana sinchichu. ¿Ima nishpataj mana rurasha ninguiyari?’ nircacuna. Chaita uyashpami Naamanca Jordán yacuman rishpa 7 cutin armarca. Chashna rurashpami alliyarca. Paica achcata cushicushpami Eliseota agradicinaman tigrarca. Chaipica, ‘cunanmi Jehová, Diostaj cashcata yachani’ nircami. Naamanca paipaj huasimanca sanomi tigrarca. Israelita huarmi huahuaca Naamanta ricushpaca ¿ima shinashi sintirishca canga?