Ki phuv Sirija, živinela sine jekh tikni izraelsko čhaj so sine dur taro ple roditelija. I sirisko vojska lelja la tari lakiri familija hem ingargje la te ovel sluginka ki romni jekhe zapovednikoskiri so vikinela pe sine Naaman. Akaja tikni čhaj služinela sine e Jehovaske čak keda o javera okolu late na kerena sine adava.

E Naamane sine le pharo nasvalipe ki koža hem celo vreme sine le bare dukha. I tikni čhaj manglja but te pomožinel le. Oj vakergja e Naamaneskere romnjake: „Me džanava nekas so šaj te pomožinel te romeske. Ko Izrael isi proroko so služinela e Jehovaske, leskoro anav tano Elisej. Ov šaj te sasljarel te rome“.

E Naamaneskiri romni vakergja leske so phengja lake i tikni čhaj. Ov sine spremno te kerel sa, adaleske gelo ko kher e Elisejeskoro ko Izrael. O Naaman mislingja kaj o Elisej valjani te dodžakerel le sar važno manuš. Ama, o proroko ni na iklilo  te kerel lea lafi, nego bičhalgja pe sluga te vakerel e Naamaneske: „Dža hem thov tut efta puti ki reka Jordan. Hem palo adava ka sasljove“.

O Naaman sine but razočarimo. Ov vakergja: „Mislingjum kaj akava proroko ka vikinel ple Devleskoro anav hem ka kerel čudo te šaj te sasljarel man. A ov vakerela mange te džav ki adaja izraelsko reka. Amen isi amen pošukar reke ki Sirija. Me šaj adari da te džav!“ O Naaman but holjangja hem gelo peske taro kher e Elisejeskoro.

O sluge e Naamaneskere pomožingje le pošukar te razmislinel. Ola vakergje leske: „Neli sian sine spremno te kere sa te šaj te sasljove? Adava so vakergja tuke akava proroko te kere, nane pharo. Soske na šunea le?“ O Naaman šungja ple slugen. Gelo ki reka Jordan hem khuvgja celosno telo pani efta puti. Palo eftato puti, ov iklilo taro pani sasto. Ov sine but radosno, hem irangja pe ko Elisej te blagodarinel pe leske. O Naaman vakergja: „Akana džanava kaj o Jehova tano čačutno Devel“. So mislinea sar osetingja pe i tikni izraelsko čhaj keda o Naaman irangja pe khere sasto?