Ki Sirija, živindža jekh tikni izraelsko čhaj koja hine dur ando pe roditeljija. I sirijsko vojska ljelja la andi olaki porodica hem ljegardža la te ovel sluškinja ki jekhe zapovednikosi romni. Ov vičindža pe Naman. Akija tikni čhaj služindža e Jehovase, čak hem ked avera uzo late na čerdže odova.

O Naman hine but nabormo andi guba hem hine lje bare dukha. I tikni čhaj but manglja te pomožini lje. Oj phendža e Namanese romnjače: „Me džanava nekas kova šaj te pomožini te romese. Ko Izrael, isi jekh prorok kova služini e Jehovase. Oljeso nav tano Jelisej. Ov šaj te sačari te rome.“

E Namanesi romni vačerdža ljese so phendža lače i tikni čhaj. Ov hine spremno sa te čerel, odoljese dželo ko e Jelisejeso čher ko Izrael. O Naman mislindža so o Jelisej valjani te adžičeri lje sar jekhe važno manuše. Ama, o prorok ni na ikljilo te vačeri oljeja, nego bičhaldža pe sluga te phenel e Namanese: „Dža  hem nandžov efta putija ki reka Jordan. Hem palo odova ka sačove.“

O Naman hine but razočarimo. Ov phendža: „Mislindžum so akava prorok ka sačari man adžahar so ka vičini pe Devlje hem ka čhivel pe vasta upro mande. A ov phenela maje te džav ki odija izraelsko reka. Amen isi amen pošukar reke ki Sirija. Me šaj hem uduri te džav!“ O Naman but holjandža hem dželo pese ando e Jelisejeso čher.

Oljese sluge pomožindže lje pošukar te razmislini. On phendže ljese: „Na li hijan lje spremno te čere sa, te šaj te sačove? Odova so phendža tuče akava proroko te čere, nane pharo. Sose na šuneja lje?“ O Naman šundža pe slugen. Dželo ki reka Jordan hem celo khuvdža ko pani efta putija. Palo eftato puti, ov ikljilo ando pani sasto. Ov hine but radosno hem irindža pe ko Jelisej te zahvalini pe oljese. O Naman phendža: „Akana džanava so o Jehova tano čačutno Devel.“ So mislineja, sar osetindža pe i tikni izraelsko čhaj ked o Naman irindža pe čhere sasto?