Sooriyu gobbara annise mininni xeertidhe heedhannoti mitte shiima Israeelawitte qaaqqo no. Sooriyu olanto ise ayiddisewiinni badde haadhe hadhino; hakkiinni ise Niˈˈimaani yinannihu olantote roorrichi galtera soqqantannota ikkitu. Hatti shiima qaaqqo heedhannohu Yihowa magansiˈrannokki manni ledooti; ise kayinni Yihowa magansiˈra diagurtino.

Niˈˈimaani gogu dhibbi amadinosi; kuni lowo geeshsha waadanno dhibbaati. Hatti shiima qaaqqo kayinni iso kaaˈla hasidhino. Konni daafira Niˈˈimaani galtera togo yitu: ‘Minaannakki ayi hursannoro afoomma. Israeelete gobbara Elsai yinannihu Yihowa masaalaanchi no. Minaannikki isiwa haˈriro huranno.’

Niˈˈimaani galte hatti qaaqqo yitinosere isira kultusi. Niˈˈimaani dhibbisinni hura hasiˈrino daafira, Elsai noowa Israeelete gobba haˈri. Niˈˈimaani, Elsai fule coyishiishannoe yee hedino. Elsai kayinni Niˈˈimaani keere haaˈrara soqqamaanchosi soyi; qoleno Niˈˈimaanira  togo yaanno gede kulinosi: ‘Yordaanoosi Lagira lamala higge lixxe fuli. Hakkiinni dhibbikkinni huratto.’

Hakkiinni Niˈˈimaani lowo geeshsha hanqi. Togo yii: ‘Kuni masaalaanchi Maganisi suˈma woshshe xibbiˈyara anga doyisse hursannoeha lawinoe. Isi kayinni Israeelete wayinni hayishshiˈri yaannoe? Sooriyu gobbara noo wayi Israeelete noo waa dirooranno? Hakkira haˈre dihayishshiˈreemmo?’ Niˈˈimaani hanqe Elsai mininni fule haˈri.

Soqqamaanosi kayinni Niˈˈimaani togo yite amaaltusi: ‘Dhibbikkinni hurate hakkiinni roorino coye assi yoommehero diassatto? Masaalaanchu dihadhe hayishshiˈrilla yiinohe? Isi yiinohe gede mayira diassatto?’ Niˈˈimaani soqqamaanosi amaaltinosi amaale macciishshi. Niˈˈimaani Yordaanoosi Laga haˈre wayi giddo lamala hige lixe fulino. Niˈˈimaani wayi giddo lamala hige lixe fuli gedensaanni, dhibbisinni huri. Hakkiinni isi lowo geeshsha hagiidhino daafira, Elsai galatara galagale higino. Niˈˈimaani Elsaira, ‘Yihowa halaalaancho Magano ikkinota xa afoommo’ yiino. Niˈˈimaani dhibbisinni hure higita, Israeelawitte qaaqqo mageeshshi geeshsha hagiidhitinoha lawannohe?