Kubaadi kangi ka nsongwakashi mu kibundji kya Siiri, kabaadi kula na kwabo. Abaadi bekakatushe mu kifuko kyaabo kwi basalayi ba mu Siiri, ako nkufika bu keena mudimo ka mukashi a mukata a basalayi abetanyina bu Naamane. Kano kansongwakashi kabaadi akalangwila Yehowa, sunga byekala shi bangi bantu beekefuunyishe tababaadi abamulangwila.

Naamane baadi mukumbe maladi a nsudi abaadi aamukyengyesha bikata. Kano ka nsongwakashi kabaadi akakimbi kumukwasha. Kabalungwile mukashi a Naamane shi: ‘Nauku muntu e kwikasha mulume oobe bibuwa. Mu Isaleele mwi mutemuki a Yehowa e n’eshina bu Elisha. Mulombeene kubuka mulum’oobe.’

Mukashi nkulungula mulum’aye. Bu bibaadi akumiina kukita kyoso kyabamulungula bwa kupanda, Naamane bayile kwi Elisha mu Isaleele. Naamane nkukulupila shi Elisha amutambula bu muntu mukata. Kadi, pamutwe wa kwisamba naye, Elisha  batumine mufubi aaye bwa kwimuna Naamane na kumulungula shi: ‘Enda okeyele misango musambo mu Mwela wa Yoordano. Akupu opashiibwa.’

Tabibaadi bisangashe Naamane nya. Bambile shi: ‘Namonanga shi mutemuki ampaasha pa kwitanyina Efile Mukulu aaye na kukisha eyasa pe mukumbo. Binobino andungula bwa kwenda ku mwela wa mu Isaleele. Aku namu twi na myela ibuwa mu Siiri. Bwakinyi ntshi naadya kwenda kwakwa?’ Naamane nkukwata nsungu, aye nkukatuka ku nshibo ya Elisha.

Bafubi ba Naamana nkumukwasha bwadya kunangusheena. Abo nkumulungula shi: ‘Su abaadya nkulungula bwa kukita kintu kikile bukopo, toboodya kwikikita? Kadi bibakulungula tabii bukopo nya. Bwakinyi twe mulombeene kwibikita?’ Naamane nkwibapushiisha. Aye nkwenda mu kwiyina misango musambo mu Mwela wa Yoordano. Kunyima kwaye kwiyina misango musambo, batundubukile mu meema kushii mukumbo. Baadi na lutumbu lukata, aye nkwaluka kwa Elisha mu nkamutumbula. Naamane nkwakula shi: ‘Binobino nauku shi nkapenda Yehowa nyi Efile Mukulu a binyibinyi.’ Omono shi ka nsongwakashi kabapushiishe naminyi pabaadi Naamane mwalukiile kushii mukumbo?