Su Siria, piạ sěngkatau anạ wawine Israel, kụ i sie marau bọu kěluargane. I sie nial᷊ạ u pasukan Siria bọu kěluargane, kụ nakoạ ělang kawingu sěngkatau těmbonangu pasukan, arenge Naaman. Anạ wawine ini měnẹ̌němbah si Yehuwa maning taumata sene tala.

Naaman nikahinongu sakị makạtatakụ su pisi kụ hanesẹ̌ gụgiadẹ̌. Anạ wawine ini sěbạe mapulu mẹ̌tul᷊ung. Hakị u ene, i sie nẹ̌bera su kawing i Naaman, ’Iạ masingkạ i sai botonge makapia si Tuang. I sie kai nabing i Yehuwa, arenge Elisa. I sie mětẹ̌tanạ su Israel.’

Kawing i Naaman apidu nẹ̌běke ene su kawinge. Tadeạu mapia, i Naaman mapulu měnal᷊ukạ kěbị undang, hakị u ene i sie nakoạ sarang bal᷊eng i Elisa su Israel. Naaman nẹ̌pikirẹ̌ i Elisa sarung měnarimạ si sie kere měnarimạ taumata penting. Katewe, i Elisa tawe nẹ̌sombang dingangi Naaman. I sie něndolohẹ̌ ělange pěněnsomahẹ̌  si Naaman kụ paul᷊ị tatanata ini: ’Pěndenọe pitung sul᷊ẹ su Sal᷊ụ Yordan, kụ i kau sarung mapia.’

Naaman sěbạe nasusah naung kụ nẹ̌bera, ’Iạ nẹ̌pikirẹ̌ i sie sarung mẹ̌kui Mawune kụ měkoạ hal᷊ẹ̌ makạlaherang gunang mapakapia si siạ. Katewe, i sie kětạeng něngoro si siạ pěndenọ su sal᷊ụ su Israel. Sal᷊ụ su Siria limembong mapaelẹ̌. Kawe i sie tawe něngoro si siạ pěndenọ sene?’ Naaman nẹ̌pědu kụ nẹ̌bal᷊ị.

Manga ělang i Naaman nẹ̌tul᷊ung si sie saụ mẹ̌tiněna pakapia. I sire nẹ̌bera, ’Bal᷊inẹbe i Tuang mapulu měkoạ kěbị haghi tadeạu mapia? Apa niorone ene sěbạe gampang. Kawe i Tuang tawe měkoạ ene?’ Naaman dimaringihẹ̌ si sire. I sie nakoạ sarang Sal᷊u Yordan kụ naurung pitung sul᷊ẹ. Bọu ene, i sie apidu napia. I sie sěbạe mal᷊uasẹ̌, kụ nẹ̌bal᷊ị sarang anung Elisa gunang makitarimakasẹ. Naaman nẹ̌bera, ’Iạ seng nakasingkạ i Yehuwa ene kai Mawu kahěngang.’ Tumuhụ si kau, kerea pěndangu anạ wawine ene su tempong nakasilo si Naaman seng napia?