Iha labarik-feto ida husi Izraél neʼebé hela iha rai-Síria no dook husi ninia família. Neʼe akontese tanba tropa Síria mak hadau nia husi ninia família no lori nia ba xefe tropa naran Naaman no sai atan ba Naaman nia feen. Labarik-feto neʼe adora Jeová maski ema seluk adora maromak falsu.

Naaman iha moras kulit neʼebé aat tebes no neʼe halo nia sempre sente moras. Labarik-feto neʼe hakarak tebes atu ajuda nia. Nia hatete ba Naaman nia feen: ‘Haʼu hatene ema neʼebé bele kura Ita-nia laʼen. Iha Izraél, iha Jeová nia profeta ida naran Eliseu. Nia bele kura Ita-nia laʼen nia moras.’

Naaman nia feen hatete ba Naaman kona-ba buat neʼebé labarik-feto neʼe dehan. Naaman hakarak koko buat naran deʼit neʼebé bele ajuda nia, entaun nia bá Eliseu nia uma iha Izraél. Naaman hein katak Eliseu sei simu nia nuʼudar ema importante. Maibé Eliseu nia atan deʼit mak atende Naaman no hatoʼo Eliseu  nia lia-menon: ‘Bá hoban an dala hitu iha Mota Jordaun, no Ita-nia moras sei lakon.’

Naaman la kontente. Nia dehan: ‘Haʼu hanoin profeta neʼe sei kura haʼu hodi bolu ninia Maromak no book ninia liman bá-mai iha haʼu-nia moras leten. Maibé nia haruka deʼit haʼu bá mota iha Izraél. Mota sira iha Síria mak diʼak liu. Haʼu bele hoban an iha mota iha Síria!’ Naaman sai hirus no fila husi Eliseu nia uma.

Maibé Naaman nia atan sira ajuda nia atu hanoin ho loloos. Sira dehan: ‘Ita-Boot prontu halo buat naran deʼit atu bele sai diʼak fali, loos ka lae? Profeta neʼe haruka Ita atu halo buat neʼebé fasil. Diʼak liu Naʼi halo tuir deʼit.’ Naaman rona ba sira. Entaun nia bá Mota Jordaun no hoban an dala hitu. Bainhira Naaman sai husi bee, ninia moras kulit lakon kedas. Nia sente agradese tebes no fila fali ba Eliseu atu hatoʼo obrigadu. Naaman dehan: ‘Agora haʼu hatene katak Jeová mak Maromak neʼebé loos.’ Tuir ó-nia hanoin, labarik-feto neʼe sente oinsá bainhira Naaman fila ba uma ho isin-diʼak?