Lo wodja wa Suriya, akikɔ yana ya yimato mɔtshi y’ose Isariyɛlɛ yakaangana etale la lakawɔ. Alembe w’ase Suriya wakawɔsɛ oma le nkumbo kande ndo nde akayonga okambi wa wadi aki owandji w’alembe wakawelɛka Namana. Yana ya yimato shɔ akatɛmɔlaka Jehowa kaanga mbele anto wakadjasɛka la nde kosalaka dikambo sɔ.

Namana aki la hemɔ ka wolo ka lo lokoho ndo nde akongaka la paa wonya tshɛ. Yana ya yimato shɔ mɛtɛ akalangaka mbokimanyiya. Nde akatɛ wadi aki Namana ate: ‘Dimi mbeyaka onto ɔmɔtshi lakoka nkɔnɔla omɛyɛ. Ekɔ omvutshi ɔmɔtshi waki Jehowa l’Isariyɛlɛ, lokombo lande Elisha. Nde koka nkɔnɔla omɛyɛ.’

Wadi aki Namana akatɛ omɛnde kɛnɛ kakawotɛ yana ya yimato shɔ. Nde akalangaka mpemba kɛnɛ tshɛ kakawawotɛka, diakɔ diele nde akatshu otsha laka Elisha l’Isariyɛlɛ. Namana akalongamɛka dia Elisha mbolongola oko onto la woke. Koko lo  dihole dia nde nsawola la nde ndamɛ, Elisha akatome okambi ande dia tosha Namana mɔyɔ ndo mbotɛ ɔnɛ: ‘Tshɔka tɔkɛ mbala esambele l’Ɔkɛdi wa Jɔrdana. Ko oma laasɔ, wɛ ayɔkɔnɔ.’

Namana akanyange efula. Nde akate ate: ‘Lakafɔnyaka dia omvutshi ɔnɛ ayɔkɔnɔla lo mbelɛ Nzambi kande ndo lo mbahɛmi anya ande. Koko, nde ombutɛ dia dimi ntshɔ lo ɔkɛdi wa lo Isariyɛlɛ. Tekɔ la ɛkɛdi w’amɛna la Suriya. Lande na kahamatshu lɛkɔ?’ Namana akomala ndo akatombe oma lo luudu laki Elisha.

Ekambi waki Namana wakokimanyiya dia nde nkana lomba dimɛna. Vɔ wakawotɛ ɔnɛ: ‘Onde wɛ hakoke nsala dui tshɛ dia wɛ nkɔnɔ? Kɛnɛ kakotɛ omvutshi ɔnɛ dia wɛ nsala kekɔ wɔdu. Lande na kahayakisale?’ Namana akaahokamɛ. Nde akatshu otsha lo Ɔkɛdi wa Jɔrdana ko akambɛ lo ashi mbala esambele. L’ɔkɔngɔ wa mbala k’esambele, Namana akatombe oma l’ashi ambɔkɔnɔ tshɛ lo tshɛ. Nde aki la lowando l’efula ndo akatshu dia tosha Elisha losaka. Namana akate ate: ‘Kakianɛ lambɛna dia Jehowa ekɔ Nzambi ka mɛtɛ.’ Oko le yɛ, ngande wakayaoke yana ya yimato y’ose Isariyɛlɛ etena kakakalola Namana ambɔkɔnɔ?