ʻI he fonua ko Sīliá, naʻe ʻi ai ha kiʻi taʻahine ʻIsileli ʻa ia naʻá ne nofo mamaʻo ʻaupito mei hono ʻapí. Naʻe ʻave ia ʻe he kau tau Sīliá mei hono fāmilí, pea naʻá ne hoko ʻi he taimi ko ení ko ha sevāniti ʻa e uaifi ʻo ha ʻeikitau ko Neamani. Naʻe lotu ʻa e kiʻi taʻahiné kia Sihova, neongo naʻe ʻikai ke pehē ʻa e kakai takatakai ʻiate iá.

Naʻe maʻu ʻe Neamani ha mahaki kili palakū, pea naʻá ne felāngaaki maʻu pē. Naʻe loto moʻoni ʻa e kiʻi taʻahiné ke tokoni kiate ia. Naʻá ne tala ange ki he uaifi ʻo Neamaní: ‘ʻOku ou ʻiloʻi ha tokotaha ʻe lava ke ne ʻai ke sai ho husepānití. ʻOku ʻi ai ha palōfita ʻa Sihova ʻi ʻIsileli ko ʻIlaisa. ʻE lava ke ne fakamoʻui ho husepānití.’

Naʻe tala ʻe he uaifi ʻo Neamaní kia Neamani ʻa e meʻa naʻe tala ange ʻe he kiʻi taʻahiné. Naʻá ne loto-lelei ke ʻahiʻahiʻi ha meʻa pē, ko ia naʻá ne ʻalu ki ʻIsileli ki he ʻapi ʻo ʻIlaisá. Naʻe ʻamanaki ʻa Neamani ʻe talitali ia ʻe ʻIlaisa ko ha tokotaha mahuʻinga. Ka ʻi he ʻikai ke lea hangatonu ʻa ʻIlaisa kiate iá, naʻá ne fekauʻi mai ʻa ʻene sevānití ke ne talitali ʻa Neamani pea  ʻoange kiate ia ha fekau: ‘ʻAlu ʻo kaukau tuʻo fitu ʻi he Vaitafe Sioataní. Pea te ke moʻui.’

Naʻe loto-mamahi lahi ʻa Neamani. Naʻá ne pehē: ‘Naʻá ku pehē ʻe au ʻe fakamoʻui au ʻe he palōfitá ni ʻaki ʻene ui ki hono ʻOtuá pea ueʻi hono nimá ki tafaʻaki mo tafaʻaki ʻi ʻolunga ʻiate au. Ka ʻokú ne tala mai ke u ʻalu ki he vaitafe ko eni ʻi ʻIsilelí. ʻOku lelei ange homau ngaahi vaitafe ʻi Sīliá. Ko e hā ʻoku ʻikai ai ke u ʻalu pē ki aí?’ Naʻe ʻita ʻa Neamani, peá ne mavahe mei he ʻapi ʻo ʻIlaisá.

Naʻe tokoniʻi ʻa Neamani ʻe heʻene kau sevānití ke ne fakakaukau lelei. Naʻa nau pehē ange: ‘ʻIkai te ke fai ha meʻa pē ke ke moʻui? Ko e meʻa ʻoku tala atu ʻe he palōfitá ni ke ke faí ʻoku faingofua ʻaupito. Ko e hā ʻoku ʻikai te ke fai ai iá?’ Naʻe fanongo ʻa Neamani kiate kinautolu. Naʻá ne ʻalu ki he Vaitafe Sioataní ʻo uku tuʻo fitu ʻi he vaí. ʻI he ʻosi ʻene uku hono fitú, naʻe ʻalu hake ʻa Neamani mei he vaí kuó ne sai fakaʻaufuli. Naʻá ne houngaʻia ʻaupito, peá ne foki ke fakamālō kia ʻIlaisa. Naʻe pehē ʻe Neamani: ‘Ko eni ʻoku ou ʻiloʻi ko Sihova ʻa e ʻOtua moʻoní.’ ʻOkú ke pehē naʻe fēfē ʻa e ongoʻi ʻa e kiʻi taʻahine ʻIsilelí ʻi he foki atu ʻa Neamani kuó ne saí?