Mucharu cha Siriya, mwenga kamsungwana kanyaki ka chiyisraele ko kwaki kwenga kutali. Kamsungwana yaka, kangutoleka kwa apapi ŵaki ndi mura wa asilikali a ku Siriya ndipu kateŵetiyanga muwolu wa mura wa asilikali zina laki Namani. Yiku kasopanga Yehova chinanga kuti ŵanthu wo kajanga nawu asopanga Yehova cha.

Namani wenga ndi nthenda yakofya pakhungu laki ndipu nyengu zosi wavwanga kuŵaŵa. Kamsungwana ko kakhumbisisanga kumuwovya. Yiku kangukambiya muwolu waku Namani kuti: ‘Ndiziŵa munthu munyaki yo wangawovya arumu ŵinu. Ku Yisraele kwe mchimi waku Yehova zina laki Elisha. Iyu wangachizga arumu ŵinu.’

Muwolu waku Namani wangukambiya murumu waki vo kamsungwana ko kangukamba. Namani wenga wakunozgeka kuchita chechosi kuti wachiri. Mwaviyo, wanguluta kunyumba kwaku Elisha ku Yisraele. Namani wakhumbanga kuti Elisha wamulondere nge munthu wapachanya ukongwa. M’malu mwakukambisana masu ndi masu, Elisha wangutuma muteŵeti waki kuti wakatawuzi Namani ndi kumukambiya kuti: ‘Luta ukasambi mu Msinji  wa Yordane maulendu 7. Pavuli paki wamuchira.’

Namani wanguguŵa ukongwa. Iyu wanguti: ‘Ndaŵanaŵananga kuti mchimi uyu wandichizgengi mwakudana Chiuta waki ndi kwendesa manja ngaki paku ini. M’malu mwaki, watindikambiya kuti ndiluti ku msinji wa kunu ku Yisraele. Te ndi misinji yamampha ku Siriya. Kumbi ndingaluta cha kweniko?’ Namani wangukwiya ukongwa ndipu wangutuwaku kunyumba yaku Elisha.

Ateŵeti aku Namani angumuwovya kuti waŵanaŵani umampha. Angumukambiya kuti: ‘Kumbi mukhumbika cha kuchita chechosi kuti muchiri? Vo mchimi uyu wakukambiyani kuti muchiti vambula kusuzga. Mwalekiyanji ŵaka kuvwiya?’ Namani wanguŵavwiya. Iyu wanguluta ku Msinji wa Yordane ndipu wangujibiza mu msinji wo maulendu 7. Namani wachizuwuka kanambala 7 mumaji, wangusanirika kuti wachira matenda ngaki. Iyu wangukondwa ukongwa ndipu wanguwere kwaku Elisha kuti wakamuwongi. Namani wanguti: ‘Sonu ndaziŵa kuti Yehova ndiyu Chiuta wauneneska.’ Kumbi uŵanaŵana kuti kamsungwana ka chiyisraele kenaka kanguvwa wuli kati kawona kuti Namani wachizgika?