Mucisi ca Siriya, kwakali kana kasimbi kana Israyeli ikakali kukkala kule acisi cabo. Kakabwezyegwa kuzwa kumukwasyi wankako abasikalumamba bana Siriya, mpoonya kakaba kabelesi kamukaintu wa Naamani silutwe wabasikalumamba. Kasimbi aaka kakali kukomba Jehova nokuba kuti bantu mbokakali kukkala limwi bakali kukomba baleza bakubeja.

Naamani wakaciswa bulwazi bucisa kapati ibwakali amubili wakwe woonse. Kana kasimbi aaka kakali kuyandisya kapati kumugwasya. Kakaambila mukaintu wa Naamani kuti: ‘Kuli muntu ngondizyi uukonzya kubaponya balumi banu. Mucisi ca Israyeli, kuli musinsimi wa Jehova wazina lya Elisha. Ulakonzya kubaponya balumi banu.’

Mukaintu wa Naamani wakamwaambila mulumaakwe ncokakamwaambila kana kasimbi. Naamani wakalilibambilide kucita cili coonse, aboobo wakaunka kuŋanda ya Elisha ku Israyeli. Naamani wakali kulangila kuti Elisha uyoomulanganya mbuli muntu uulemekwa kapati. Pele muciindi cakuti aambaule anguwe cacigaminina, Elisha wakatuma  babelesi bakwe kuti bamwaanzye Naamani akumwaambila kuti: ‘Koya ukasambe ziindi zili 7 mu Mulonga wa Jordano. Mpoonya uyoopona.’

Naamani wakatyompwa kapati akwaamba kuti: ‘Ndalikuyeeya kuti musinsimi ooyu ulandiponya kwiinda mukwiita Leza wakwe akubikka maanza aakwe alindime. Pele muciindi caboobo, undaambila kuti nduunke kumulonga ooyo wamu Israyeli. Swebo tulijisi milonga mibotu mu Siriya. Sena inga tiicabota kuti ndaunka buyo nkuko?’ Naamani wakanyema kapati akuzwa aŋanda ya Elisha.

Babelesi ba Naamani bakamugwasya kuzilanga kabotu zintu. Bakamwaambila kuti: ‘Sena inga tonoocita cili coonse kutegwa upone? Musinsimi ooyu ncaakwaambila kuti ucite, tacikatazyi pe. Kocita buyo!’ Naamani wakabamvwida babelesi bakwe. Mpoonya wakaunka ku Mulonga wa Jordano akulifwusa mumeenda ziindi zili 7. Naakalifwusa camamanino, Naamani wakazwa mumulonga kaponede cakumaninina. Wakakkomana kapati, kumane wakaunka kuyoomulumba Elisha. Mpoonya Naamani wakati: ‘Lino ndazyiba kuti Jehova ngo Leza wakasimpe.’ Ino uyeeya kuti kana kasimbi kana Israyeli kakalimvwa buti nokakabona kuti Naamani wapona?