Long kantri Siria, i gat wanpela liklik meri Israel, em i stap longwe long ples bilong em. Ami bilong Siria i bin kisim em long famili bilong em, na nau em i stap olsem wokmeri bilong meri bilong kepten bilong ami nem bilong em Naman. Dispela liklik meri i lotuim Jehova, maski lain em i stap wantaim i no lotuim Jehova.

Naman i gat wanpela sik nogut long skin, na olgeta taim em i pilim pen. Dispela liklik meri i laik tru long helpim em. Em i tokim meri bilong Naman: ‘Mi save long husat inap mekim man bilong yu i kamap orait. Long Israel, i gat wanpela profet bilong Jehova nem bilong em Elisa. Em inap oraitim man bilong yu.’

Meri bilong Naman i tokim Naman long tok bilong dispela liklik meri. Naman i redi long mekim olgeta samting, so em i go long haus bilong Elisa long Israel. Naman i ting Elisa bai bungim em olsem wanpela bikman. Tasol Elisa i no mekim olsem, em i tokim  wokman bilong em long gritim Naman na mekim dispela tok: ‘Go na waswas 7-pela taim long Wara Jordan. Na bai yu kamap orait.’

Naman i bel hevi tru. Em i tok: ‘Mi ting dispela profet bai oraitim mi na singaut long God bilong em na muvim han bilong em i go i kam antap long mi. Tasol nogat, em i tokim mi long go long dispela wara long Israel. Mipela i gat ol gutpela wara long Siria. Wai na mi no inap go tasol long hap?’ Naman i belhat, na em i lusim haus bilong Elisa.

Ol wokman bilong Naman i helpim em long tingting gut. Ol i tokim em: ‘Yu no laik mekim samting bilong kamap orait, a? Samting dispela profet i tokim yu long mekim i no hatwok. Wai na yu no laik mekim tasol?’ Naman i harim tok bilong ol. Em i go long Wara Jordan na kalap i go insait long wara 7-pela taim. Bihain long namba 7 taim, Naman i kamap orait na kam aut long wara. Em i amamas tru, na em i go bek bilong tok tenkyu long Elisa. Naman i tok: ‘Nau mi save olsem Jehova em i God tru.’ Yu ting dispela liklik meri Israel i pilim olsem wanem taim Naman i kamap orait na kam bek?