I te fenua no Arama, i vai na te hoê tamahine iti Iseraela. Ua atea roa oia i to ˈna fare. Na te nuu Arama i haru ia ˈna mai to ˈna utuafare. I teie nei, te tavini nei oia i te vahine a Naamana. E raatira hoi o Naamana no te nuu Arama. Ua haamori teie tamahine iti ia Iehova, noa ˈtu aita te nunaa Arama i na reira.

Ua roohia Naamana i te hoê maˈi iri hairiiri e ua mauiui noa oia. Ua hinaaro iho â te tamahine iti e tauturu ia ˈna. Ua parau oia i te vahine a Naamana: ‘Te vai ra te hoê taata o te nehenehe e tauturu i ta oe tane. I Iseraela, te vai ra te hoê peropheta a Iehova, o Elisaia to ˈna iˈoa. E nehenehe oia e faaora i ta oe tane.’

Ua parau te vahine a Naamana i ta ˈna tane eaha ta te tamahine iti i faaite mai. Ua hinaaro iho â o Naamana e ora mai. Ua haere ïa oia i ǒ Elisaia i Iseraela. Ua manaˈo o Naamana e farii Elisaia ia ˈna mai te feia tuiroo e fariihia. Aita râ o Elisaia i haere e farerei ia ˈna. Ua tono oia i ta ˈna tavini no te farii ia Naamana e no te faatae atu i te hoê poroi: ‘A haere e  hopu e hitu taime i roto i te anavai Ioridana. E e ora mai oe.’

Ua inoino roa Naamana. Ua parau oia: ‘Manaˈo atu vau e e faaora mai te peropheta ia ˈu ma te tuô i to ˈna Atua e ma te rave i te mau ohipa faahiahia mau. Ua parau noa râ oia ia haere i tera anavai i Iseraela. Mea maitai aˈe hoi te mau anavai i Arama. No te aha eita vau e haere noa i ǒ?’ Ua riri o Naamana e ua faarue oia i te fare o Elisaia.

Ua tauturu râ te mau tavini a Naamana ia ˈna ia feruri maitai. Ua parau ratou ia ˈna: ‘Eita anei oe e rave i te mau ohipa atoa no te ora mai? Mea ohie roa ia rave i ta te peropheta i parau ia oe. A rave noa paha ïa i te reira.’ Ua faaroo Naamana ia ratou. Ua haere oia i te anavai Ioridana e ua hopu atu e hitu taime. I muri aˈe i te hituraa o te taime, ua tia mai Naamana i rapae i te pape e ua ore roa to ˈna maˈi. Ua mauruuru roa oia e ua hoˈi oia i ǒ Elisaia no te haamauruuru ia ˈna. Ua parau Naamana: ‘Ua ite au i teie nei e o Iehova te Atua mau.’ No oe, eaha te huru o te tamahine iti no Iseraela a ite ai e ua ore roa to Naamana maˈi?