Сирияга Израильден кул кылдыр тудуп эккелген бичии уруг чурттап чораан. Ону өг-бүлезинден чарып аппарган. Ол Нееман дээр шериг баштыңчызының кадайынга бараалгап турган. Долгандыр улус дүрзү-бурганнарга чүдүп турза-даа, ол бичии уруг Иеговага ынак чораан.

Нееман кеш аарындан хинчектенип турган. Ол экирий берзин дээш, бичии уруг ооң кадайынга: «Нееманга дузалажып шыдаар кижини билир мен. Ооң адын Элисей дээр. Ол Иегованың Израильде чурттап турар медээчизи-дир. Ол силерниң ашааңарны экиртип шыдаар» — деп сүмелээн.

Нееманның кадайы бичии уругнуң сөстерин ашаанга чугаалаан. Ол аажок өөрүп, Элисейниң Израильде бажыңынче чорупкан. Медээчи ону тускай кылдыр уткуп-хүлээп алыр боор деп, Нееман бодаан. Ынчалза-даа Элисей олче уткуштур үнмейн, чалчазын Нееманга мынча дээр кылдыр чоргузупкан: «Иордан хемге баргаш,  аңаа чеди катап сугже кир. Ынчан экирий бээр сен».

Нееманның чөгели төнүп: «Медээчи Бурганынга мөргээш, холу-биле аарыг черлеримге дээптерге, экирий бээр мен деп бодадым. Ол анаа-ла мени Израильде хемге кирип ал диди! Бистиң Сирияда оон-даа эки хемнер бар болгай. Аңаа-даа кирип алырымга канчап баар чувел?» — деп хорадап чугаалаан.

Ынчалза-даа ооң чалчалары аңаа дузалажыксааш: «Дээрги, экирий бээр дээш чүнү-даа кылырынга белен турдуңар. Ол медээчи силерге дыка белен чүүл чугаалады ышкажыл. Шенеп көрүңер даан!» — дишкеннер. Нееман оларның сүмезин дыңнааш, Иордан хемге келгеш, чеди катап шымныпкан. Ол сугдан үнүп кээрге, кежинде чаңгыс-даа балыг чок болган. Нееман өөрээнинден Элисейге четтиргенин илереткен: «Мен ам-на билдим, Иегова — алыс шын Бурган-дыр!» Дээргизи кадык чедип кээрге, ол бичии израиль уруг кайы хире өөрээн деп бодаар сен?