Ta lum yuʼun Siria, ay jtul tut israel-achʼix te namal jil te sna sok te sfamiliae. Jaʼ ikʼot bael yuʼun te soldadoetik yuʼun Siria, jich kʼot ta j-abat yuʼun te yinam Naamán te jaʼ jtsobaw yuʼun soldadoetik. Te tut achʼix-abi jaʼ yichʼoj ta mukʼ te Jehová manchukme te ants winiketik te banti yak ta nainel maba ya yichʼik ta mukʼ stukelik.

Te Naamán yichʼoj tulan chamel ta sbakʼetal te bayal skʼuxule. Te tut achʼix la skʼan skoltay, jich yuʼun la yalbey te yinam te Naamán: “Ay machʼa ya jnaʼbey sba te ya xjuʼ ya slekubtes te amamlale. Ta lum Israel ay jtul j-alwanej yuʼun Jehová te Eliseo sbiile. Jaʼ ya xjuʼ ya slekubtes te amamlale”.

Te ants la scholbey yaʼiy te Naamán te bin albot yuʼun te tut achʼixe. Te Naamán la spas tulan ta sleel te bintik ya xjuʼ xlekubtesot yuʼune, jaʼ yuʼun bajtʼ ta Israel ta sna te Eliseo. La skuy te ya xlokʼ ta tael yuʼun te Eliseo jich bitʼil jtul winik te mukʼ skʼoplale. Pero ma jichuk kʼot ta pasel, te Eliseo la stikun te j-abat yuʼun ta spatbeyel yoʼtan te Naamán sok ta  yalbeyel te kʼopetik ini: “Baan sok mula aba jukeb buelta ta mukʼul jaʼ Jordán. Jich ya xlekubat”.

Te Naamán ma lek la yaʼiy-abi sok jich la yal: “La jkuy te j-alwanej ini ya skʼopon te Dios yuʼun ta slekubtesbelon sok te yanuknax ya sjach-a te skʼabe. Pero te binax la yalbone jaʼ te ya xboon ta mukʼul jaʼ yuʼun Israel. Ay lekil mukʼul jaʼetik kuʼunkotik ta Siria. ¿Bin yuʼun ma xjuʼ xboon tey-a?”. Te Naamán bayal ilin yuʼun, jich lokʼ bael ta sna te Eliseo.

Te Naamán koltayot yuʼun te j-abatetik yuʼun ta snopel ta lek. Jich albotik yuʼun: “¿Mabal jichuk te chikan bin ya apas ta skaj te ya akʼan xlekubate? Te bin la skʼanbat te j-alwanej ini maba wokol ta pasel. ¿Bin yuʼun ma xa apas?”. Te Naamán la schʼuun spasel, jich bajtʼ ta mukʼul jaʼ Jordán sok jukeb buelta la smul sba tey-a. Ta sjukebal buelta te lokʼ tale, te Naamán lekubenix-a. Kʼax tseʼel yoʼtan la yaʼiy sba, sujt bael ta stojol te Eliseo ta yalbeyel wokol. Jich la yalbey: “Ta ora ini jnaʼojix te jaʼ Jehová te smelelil Diose”. Te Naamán lekubenix te kʼalal sujt bael ta snae. ¿Bin-utʼil ya akuy te la yaʼiy sba te tut achʼix kʼalal la yil te Naamane?