Elapo ya oSiria aahikhala mwaaruusi mmosa mwIsarayeli. Mwaaruusi owo aavariwe ni anakhotto a oSiria khuroihiwa elapo ele yootteivela emusi awe. Nto owo aahikhalihiwa murumeyi a mwaarawe mukhulupale a anakhotto aitthaniwa Naamani. Mwaaruusi owo aanimukokhorela Yehova nnaamwi aakhala ni atthu a itiini sikina.

Naamani aahikhalana eretta yootepa otakhala yeeyo enihonona erutthu. Nto eretta eyo yaaninwereya okathi wotheene. Mwaaruusi ole aahimuleela mwaarawe Naamani wira: ‘Kinnimusuwela mutthu oniwerya waakhaliherya aiyanyu. WIsarayeli ookhala profeta a Yehova oniitthaniwa Eliseyo. Owo onoowerya ompenuxa iyanyu’.

Mwaarawe Naamani aahimuleela iyawe masu a mwaaruusi ole. Naamani aahimananiha opaka khula etthu, nto aahirowa owannyawe profeta Eliseyo, wIsarayeli. Naamani aalipelela wira Eliseyo aarowa omwaakhela ntoko mukhulupale. Masi, ohiya olavula ni Naamani, Eliseyo aamurumme murumeyi awe wira olavule ni Naamani ni  amuleele etthu yoopaka. Owo aahimuhimeerya so: ‘Muroke mwarape ikwaha 7 mmuro Yordani. Nuumala-vo oretta anyu onoomala’.

Naamani aahinanariwa vanceene nto khuhimya so: ‘Miyo kaatthokelela wira profeta ola aarowa omulompa Muluku awe akitexeryaka matata awe. Masi onkiruma orowa orapa mmuro mwa wIsarayeli. Hiyo nookhalana miro sooreera oSiria. Xeeni ohinkiruma awe orowa orapa weiwo?’ Naamani aahinanariwa ni aahirukunuwa anarowa elapo awe.

Arumeyi awe Naamani yaahimukhaliherya wuupuwelela saana mwaha ole. Yaahimukoha so: ‘Mwaarummwale opaka khula etthu wira mukhale saana, nyuwo khimwaapaka? Etthu Profeta ola oorumalyaaweni ti yookhweya. Xeeni vano muhimphavela anyu omwiiwelela?’ Naamani aahiiwelela miruku iye, nto aahirowa omuro Yordani ni aahirapa ikwaha 7. Nuumala orapa ekwaha yookiserya aahikhuma mmaasini oretta awe omanle ene. Owo aahixukhurela vanceene, ni aahirowa omuxukhurela Eliseyo. Naamani aahihimya so: ‘Vano koosuwela wira, Yehova ti Muluku eekeekhai’. Munoonela sai, niireke mwaaruusi ole a wIsarayeli aahihakalala vaavo aamoonale awe Naamani ohokolowaka oretta awe omanle ene?