Ha nasud han Sirya, may Israelita nga daragita nga hirayo gud ha iya pamilya. Ginkuha hiya han mga sundalo han Sirya tikang ha iya pamilya, ngan yana surugoon hiya han asawa han lider han kasundalohan nga hi Naaman. Ginsisingba hini nga daragita hi Jehova, bisan kon an mga tawo nga nakapalibot ha iya iba an ginsisingba.

Hi Naaman may grabe nga sakit ha panit, ngan pirme ito maul-ol. Karuyag gud hiya buligan han daragita. An daragita nagsiring ha asawa ni Naaman: ‘May kilala ako nga makakabulig ha imo bana. Ha Israel, may propeta hi Jehova nga an ngaran Eliseo. Matatambal niya an imo bana.’

Ginsumatan hi Naaman han iya asawa han ginsiring han daragita. Andam hi Naaman nga sarihan an bisan ano, salit kinadto hiya ha balay ni Eliseo ha Israel. Kahuna niya nga tatrataron hiya ni Eliseo sugad nga importante nga tawo. Pero imbes nga makiistorya hi Eliseo hin personal, ginsugo niya an iya surugoon nga isumat kan Naaman ini nga mensahe: ‘Kadto ha Salog Jordan ngan lurop didto hin pito ka beses. Katapos hito, matatambal ka.’

 Nag-isog gud hi Naaman. Nagsiring hiya: ‘Kahuna ko nga tatambalon ako hini nga propeta pinaagi ha pagtawag ha iya Dios ngan pagkurokompas han iya mga kamot. Pero ginsidngan la ako nga kumadto hini nga salog ha Israel. Mas maopay an amon mga salog ha Sirya. Kay ano nga makadto pa ako?’ Nasina hi Naaman ngan bumaya ha balay ni Eliseo.

Ginbuligan hi Naaman han iya mga surugoon nga makapanhunahuna hin maopay. Nagsiring hira ha iya: ‘Di’ ba bubuhaton mo an ngatanan basi ka matambal? Simple la an iginpapabuhat ha imo hini nga propeta. Kay ano nga diri mo ito buhaton?’ Namati ha ira hi Naaman. Kinadto hiya ha Salog Jordan ngan linurop hin makapito. Katapos han ikapito ka beses, hinaw-as hiya nga waray na sakit. Nalipay gud hiya ngan binalik basi pasalamatan hi Eliseo. Hiya nagsiring: ‘Yana, maaram na ako nga hi Jehova an tinuod nga Dios.’ Ano daw la an gin-abat han Israelita nga daragita han inuli hi Naaman nga waray na sakit?