Rogo gu ringara nga Suria, wiri tooni degude ni boro Yisaraere adu yo nga guri naadu tuturũ ti kpuyo. Agu asekere nga ga Suria yo nadi ri be abari na nari, na awere ri kini da ni moyambu fu dia gu barutiriivura rimoko angia Namana. Gu wiri tooni degude re anaairiso Yekova, wa si avura du vurũ nga agu aboro naadu pati ri aairisongo ko te.

Namana adu na kere kaza ti kpotoko, na ko anaaigirã behe ti aregbo dũ. Gu wiri tooni degude re aaida nzunzu ka undo ko. Ri ape gupai fu dia Namana nga: ‘Boro gudu ho mi na ini ni rengbe ka husa kumbamo. Ga Yekova nebi gudu Yisaraere yo du rimoko nga Erisa. Ko ima rengba ka husa kumbamo.’

Dia Namana ape gupai fuko gu tooni degude re agumbaha. Namana aima du na nyemu ka asada ai pai, sidu, ko andu kua Erisa yo Yisaraere yo. Namana aaberã gupai nga Erisa nika diako kugume ni nyanyakipa boro. Ono kuba gupai nga Erisa ye ka fura na Namana, ko akedi kina gako moyambu fuo Namana ko pe gupai  fuko nga: ‘Mo ndú ki zundu tiro Yaradene yo bara saba. Fuoho, kpotoro nika duadu gigiri.’

Rago aima gberã ti Namana ni kerehe. Ko ki ya: ‘Mi niberẽ he tigimi ya gi nebi re nika husa re ni yamba ko gako Mbori na ki zadi re na beko. Kuba gure, ko pe gupai fere nga mi ndu ku rogo gu di du Yisaraere no re. Wene adi du berani Suria yo. Tipagine ka mi andunga kina koyo ti ni ya?’ Namana adu na zinga na ko ki guari kua Erisa yo.

Ga Namana amoyambu aundo ko ko berẽ wenengai. I ape gupai fuko nga: ‘Ka mo manginga ai pai tipa ka hu te? Gupai gi nebi nagumbaha foro re, si gbua taata. Tipagine ka mo amanganga ha ti ni ya?’ Namana adegetuko fuyo. Ko andu ku rogo gu di nga Yaradene ki ti ku ime yo bara saba. Tingbafuo saba ha, Namana akuru ime yo na kpotoko ni gigiri he dunduko. Ko adu na bakere ngbarago, na ko ki ndu kafu tambuahe fu Erisa. Namana ape gupai nga: ‘Mi inihe ya Yekova nga ndikidi Mbori.’ Mo naberãha nga gu wiri degude re adu wai ho Namana ayego ni na kpotoko si naima hu?