Toib nidxigonaʼyen de gudx Israel golésbu lainy gudx Siria, nigolú sit de xfamilbu. Soldad de gudx Siria goyné láabu né gócbu xomós tzeʼel Naamán ni gosanir nisló soldad. Nidxigonaʼyen reʼ biembu Jehová ná goyoʼbu lad buñ ni diti buny láani.

Naamán gopbu toib galguitz mal ni bilat guidopy laidybu, né ngú nigolú bisioʼob láabu. Nidxigonaʼyen reʼ goniiny láabu ñacnébu, por ngú gochbu tzeʼel Naamán: «Naʼ rimbuya toib buñ ni labúu guisial tzeʼel lo. Lainy gudx Israel noʼ toib profeta xtuny Jehová ni laa Eliseo. Né labúu guisialbu tzeʼelo».

Gonaʼ reʼ gochbu Naamán ni goniʼ nidxigonaʼyencu. Goniiny láabu ñonybu prueby nitisi cós par labúu ñalbu, por ngú goyeebu lidx Eliseo lainy gudx Israel. Bisacsa Naamán nacacuent Eliseo láabu xomod toib buñxirop. Per xalagary nareʼ Eliseo nacacuent láabu, bixelbu xomósbu par nareʼ né góoch  diitzreʼ láabu: «Goyee binidx lainy guʼuc Jordán gatz buelt, né ór cú sialo».

Naamán diti bioladxbu ngú, né goniʼbu: «Naʼ raabi nareʼ profeta Eliseo né nanabbu lóo Dios xtunybu né nascaʼbu ñabu par guiaʼ né ñonybu toib galrradziguiaʼ. Per nosi gochbu naʼ tzaʼya guʼuc Israel. Más sacró nac guʼuc ni noʼ Siria. ¿Xí diti más galán ñaʼya lainy guirá guʼuc cú la?». Naamán nigolú bidzuitz né bireʼbu lidx Eliseo.

Xomós Naamán gocné láabu par natzaʼbu xpensarybu. Gochyibu Naamán: «¿Xí diti raniiny looy guiaalo la? Diti nagan ni canab profeta Eliseo looy, buny láani». Naamán bisob layibu, ór cú goyeebu guʼuc ni noʼ Jordán né binidxbu lainyni gatz buelt. Ro ma bisaʼ gatz buelt ni goyoʼbu lainy nís, bialbu. Nakitgoluʼ goyoʼbu né bibiguetbu par biduidybu guixquix Eliseo. Né goniʼbu: «Nigoreʼ ma naana que Jehová ngú Dios ni nigolú». Xpensarylo, ¿ximod gosac nidxigonaʼyencu órni bibiʼbu ma bial Naamán?