Ben-hadad m’ubimo mi Cami umedere asu nisayu nyithindho mir Israel kud ali. Ento saa ceke jabila Elica ubed upoyo ubimo mir Israel, uketho ebed epondo. E Ben-hadad ukeco nia mito emak Elica. Nindo moko, ewinjo nia Elica ni i adhura mi Dothan, e eoro juaskari mi Cami gicidh gimake.

Juaskarine gitundo i adhura mi Dothan ku diewor. Urwonde kugweno, jatic pa Elica uwok woko man eneno udul askari utieko adhura zoo. Lworo ugam umake, e ekok kumae: ‘Elica, wabitimo nenedi?’ Elica uwacu ire kumae: ‘Ju ma gin’i bang’wa sagu ju ma ni kugi.’ I saa maeno, Yehova uyabu wang’ jatic pa Elica, e eneno magali mi mac mi lwiny upong’o wi gudi ceke m’utwodo adhura.

Kinde ma juaskari mi Cami gimito nimaku Elica, e egam erwo kumae: ‘Yehova akweyi, goigi ku corwang’.’ E mbwang’ kumeni, Yehova unyotho wigi, e ging’eyo ngo nia gini kani. Elica uyero  igi kumae: ‘Wurwinyo, eni tie ngo adhura ma wubesayu. Wulub toka, abiterowu i bang’ ng’atu ma wubesayu.’ E gilubo tok Elica nitundo i Samaria, kaka ma ubimo mir Israel bedo i ie.

I ng’eye ka juaskari mi Cami ubin unyang’ nia gin’i Samaria. Ubimo mir Israel upenjo Elica kumae: ‘Aneggi?’ Nyo Elica unwang’u nia eno tie tap saa mi culo kwor i kum dhanu maeno ma gimito gitime rac? Ungo. Elica uyero kumae: ‘Kud ineggi, ento mii igi cam man wek gidoki.’ E ubimo ugam uketho juyiko igi cemo ma dit man i ng’eye eweko gidok.