Raja ni Siria, i ma si Benhadad, torus mamorangi halak Israel. Alani i, sai dipaingot panurirang Elisa do raja ni Israel asa malua. I do alana, naeng ditangkup si Benhadad ma si Elisa. Dilului raja i ma si Elisa di Dotan, jala disuru ma tentara ni Siria laho manangkup si Elisa.

Tingki borngin, ro ma angka tentara ni Siria tu Dotan. Manogotna i, diida pangurupi ni si Elisa ma nunga dihaliangi angka tentara kota i. Mabiar situtu ma ibana jala didok ma, ‘Elisa, songon dia nama on?’ Didok si Elisa ma tu ibana, ‘Gumodang do donganta sian nasida.’ Dibahen Jahowa ma asa boi diida pangurupi ni si Elisa angka hoda dohot angka kareta na marapi di humaliang ni dolok i.

Tingki ro tentara ni Siria manangkup si Elisa, martangiang ma ibana. Didok ma, ‘Jahowa, bahen ma asa bingung nasida.’ Gabe ndang diboto angka tentara i be manang aha na laho siulahononna. Didok si Elisa ma tu nasida, ‘Ndang dison hutana i. Ihuthon ma ahu,  asa hupatudu baoa na laho tangkuponmuna i.’ Diihuthon nasida ma si Elisa jala sahat ma nasida tu Samaria, inganan ni raja ni Israel.

Ujungna diboto halak Siria ma, ndang i huta i. Disungkun raja ni Israel ma si Elisa, ‘Hubunu ma nasida?’ Olo do si Elisa tingki didok raja i songon i? Daong. Didok si Elisa, ‘Unang bunu nasida. Lehon ma nasida mangan, dung i suru ma nasida laho.’ Dibahen raja i ma pesta, dung i disuru ma nasida mulak tu hutana.