An Israel pauruutrong sinasalakay kan hadi kan Siria na si Ben-hadad. Pero sa kada pagsalakay, pinapatanidan kan propetang si Eliseo an hadi kan Israel, kaya nakakadulag ini. Kaya nagdesisyon si Ben-hadad na dakupon si Eliseo. Naaraman niya na nasa siyudad nin Dotan si Eliseo. Nagpadara siya duman nin hukbo para dakupon ini.

Banggi nag-abot sa Dotan an mga Siriano. Kinaagahan, nagluwas an lingkod ni Eliseo asin nahiling kaini na napapalibutan an siyudad nin dakulang hukbo. Natakot ini asin nagkurahaw: ‘Eliseo, anong gigibuhon ta?’ Sinabi saiya ni Eliseo: ‘Mas dakul an kaibanan ta kisa sainda.’ Tapos, pinangyari ni Jehova na mahiling kan lingkod ni Eliseo an dakulon na kabayo asin nagkakalayong panggiyerang karwahe na nasa mga bukid sa palibot kan siyudad.

Kan dadakupon na si Eliseo kan mga suldados na Siriano, namibi siya: ‘Jehova, butahon mo po sinda.’ Bigla na sana, dawa nakakahiling pa man an mga suldados, dai na ninda aram kun hain na sinda. Sinabi ni Eliseo sa mga suldados: ‘Sala an dinumanan  nindong siyudad. Magsunod kamo sako, dadarahon ko kamo sa lalaking hinahanap nindo.’ Sinundan ninda si Eliseo sagkod sa Samaria, kun sain nakaistar an hadi kan Israel.

Huri na kan maaraman kan mga Siriano kun hain sinda. Hinapot si Eliseo kan hadi kan Israel: ‘Ano, gadanon ko na sinda?’ Ginamit daw ni Eliseo an pagkakataon na iyan para makabalos sa mga tawong ini na gustong dumakop saiya? Dai. Sinabi ni Eliseo: ‘Dai mo sinda paggadanon. Pakakanon mo sinda, tapos paulion mo na.’ Kaya nagpahanda an hadi nin dakul na kakanon para sainda. Pagkatapos pinauli na sinda.