Raja Siria eme Benhadat, terus iserangna kalak Israel. Tapi perban raja Israel terus ipersingeti nabi Elisa, emaka banci kalak e selamat. Emaka itangkap Benhadat atena Elisa. Sanga ieteh Benhadat si Elisa lit i kuta Dotan, isuruhna tentera Siria ku je nangkapsa.

Tentera Siria reh ku Dotan sanga nggo berngi. Kenca nggo terang wari medak me pelayan Elisa janah idahna mbue tentera i sekeliling kuta e. Mbiar kel ia janah nina, ‘Elisa, uga siban e?’ Nina Elisa, ‘Buen nge si ras kita asangken si ras kalak ah.’ Kenca si e, iban Jahwe me pelayan Elisa e banci ngidah gereta kuda ras tentera si gara bagi api i gunung-gunung sekeliling kuta e.

Sanga itangkap tentera Siria atena Elisa, ertoto me Elisa nina, ‘O Jahwe ban min kalak e buta.’ Amin pe mata tentera-tentera banci ngidah, tapi la ietehna dalan. Nina Elisa man tentera e, ‘Labo enda kuta si darami kena. Mari ikutken aku gelah kutuduhken kalak si daramindu.’ Iikutken kalak e Elisa seh ku Samaria, ingan raja Israel tading.

Dungna, sengget tentera Siria e sanga ietehna nggo seh ia i Samaria. Isungkuni raja Israel me Elisa, nina, ‘Kubunuh saja kalak e?’ Igunaken Elisa nge kesempaten e guna mbalas dendam? Lang. Nina Elisa, ‘Ula bunuh kalak e. Bere kalak e man, nce suruh kalak e mulih.’ Ibereken raja mbue pangan man tentera e, dung e isuruhna mulih ku rumahna.