Ben-hadad, njôô ya Syrie a mbe a jeñe’ éyoñ ése na, a zu wosane Israël. Ve nkulu mejô Élisée a nga kate de njô bôt ya Israël; nye ve tup. Nde Ben-hadad a nga tyi’i na, a zu bi Élisée. Éyoñ a nga wô’ô na, Élisée a ne tisone ya Dothan, nde a nga lôme nkane bita wé na ô ke bi nye.

Ane Besyrien be nga zu Dothan alu. Éyoñe mbo ésaé Élisée a nga kune kôlô si mame tyé, nde a nga teme na, nkan bita Besyrien ô bômaneya tison ése. Nye ve zu ko woñ, a taté na a loon Élisée a jô’ô na: ‘Bia zu bo aya Élisée?’ Nde Élisée a nga jô nye na: ‘Ba be ne a bia be ne abui a dañe ba be ne a be.’ Été été, Yéhôva a nga bo na mbo ésaé Élisée a yen bikabela a bewagon be nduan be bôma’ane minkôl.

Éyoñe bezimbi bete be nga kômbô bi nye, Élisée a nga ye’elan Yéhôva na: ‘Éngôngol a Yéhôva, bo’o na bôte ba be bo ndim.’ Bezimbi bete be nga jañele fek, teke fe beta yeme vôme  be né. Nde Élisée a nga jô be na: ‘Mia te kobe zen. Tôñané ma, ma ye liti mia môte mia jeñ.’ Be nga tôñ Élisée akekui Samarie vôme njôô ya Israël a mbe a too.

Besyrien be nga yemelane vôm be mbe, valé be tyimbiya ôlam. Njô bôte ya Israël a nga sili Élisée na: ‘Ye me wôé be?’ Ye wo buni na, Élisée a nga kañese na be wôé besiñe bé bete? Momo. Élisée a nga jô na: ‘Te wôé be. Va’a be jôme ya di be bulane vôme ba so.’ Ane njô bôt a nga ve be abui bidi, a bo na be bulan nlame wop.