Ben-Hadad mwene w’o Síria oroma oraba koddo na aIzrayel. Aizrayel avuneya sabwa ya namavuhulela Elizeu wawaddela yokosa. Mwene Ben-Hadad wahifuna wi amuttidde Elizeu. Mutameleliye oona wi Elizeuyá wakala o sidadi ya Dotan, owarumawo anyakoddo a Síria wi amuttidde.

Akadda Síria afiya o Dotan na mattiyu-namattiyu. Mmembesinimwá, mwimeleli wa Elizeu obudduwela otakulu bona wi arijiwa na anyakoddo a Síria. Iyene orurumuwa okuwa: ‘Elizeu, nikose dhavi?’ Elizeu omwaddela: ‘Onove, anyakoddo ehu ahinjiva opitta awa.’ Nomala Yehova omooniha mwimeleli wa Elizeu anyakoddo a motto arijile myango dhotene owerewera sidadiya.

Anyakoddo a Síria afunaga omuttidda Elizeu, iyene olobela: “[Yehova], kàpibeni omentoni attu aba.” Momaguvamwene, awene adduwala dila yadhowani. Venevo, Elizeu ohapanga dhahi: ‘Dila enfwarinyu kahiyo ejene. Ddifwarení miyo, ddinouvelelaniwo.’ N’eji ahinfwara Elizeu mpaka ofiya o Samariya, wali mwene wa Izrayel.

 Osogorhowa, akadda Síria azinddiyela walani. Mwene wa Izrayel ohimvuza Elizeu: ‘Abayá ddàpe?’ Elizeu wahirumeela wi attu aba atamela ompa wi apiwe? Nne. Iyene ologa dhahi: ‘Kamwape. Avaheni oja, mugamala mwattiye adhowe.’ Mwene wa Izrayel wahikosiha mattanga manddimuwa, nomala wattiya odhowa.