Edidem Syria emi ekekerede Ben-hadad ama esidi en̄wan ye Israel kwa ini kwa ini. Edi prọfet Elisha ama esiteme edidem Israel se enye akpanamde mbak mbon Syria idinam mmọ n̄kpọ. Oro ama anam Ben-hadad oyom usụn̄ ndimụm Elisha nnyọn̄. Ẹma ẹdọhọ enye ke Elisha odu ke Dothan, ntre enye ama ọdọn̄ mbonekọn̄ esie ete ẹka do ẹkemụm enye.

Mbonekọn̄ Syria ẹma ẹdi Dothan okoneyo. Asan̄autom Elisha ama edemede usenubọk edikụt ata ediwak mbonekọn̄ Syria ẹkande ofụri obio oro ẹkụk. Ọkpọsọn̄ ndịk ama anam enye ofiori ete: ‘Elisha, nso ke idinam idahaoro?’ Elisha ama ọdọhọ enye ete: ‘Mbon emi ẹdude ye nnyịn ẹwak ẹkan mmọ.’ Jehovah ama anam asan̄autom Elisha okụt ke enan̄-mbakara ye mme chariot ekọn̄ emi ẹsakde ikan̄ ẹyọyọhọ nsio nsio obot obio oro.

Ke ini mbonekọn̄ Syria ẹkeyomde ndimụm Elisha, enye ama ọbọn̄ akam ete: ‘Jehovah mbọk nam enyịn ekịm mmọ.’ Mmọ ẹkesụk ẹkekeme ndikụt usụn̄, edi mmọ ikọdiọn̄ọke aba ebiet  emi mmọ ẹdude. Elisha ama ọdọhọ mmọ ete: ‘Ẹmedue usụn̄. Ẹdi yak nda mbufo n̄kowụt owo emi mbufo ẹyomde.’ Mmọ ẹma ẹtiene Elisha ẹkesịm Samaria emi edidem Israel okodụn̄de.

Ini oro ndien ke enyịn akatara mbonekọn̄ Syria; edi ini ama ebe akaha. Edidem Israel ama obụp Elisha ete: ‘Ndi n̄wot mmọ?’ Ndi Elisha ama ada ufan̄ oro osio mbon oro ẹkeyomde ndinam enye ibak usiene? Ihih. Elisha ama ọdọhọ enye ete: ‘Kûwot mmọ. Nọ mmọ n̄kpọ ẹdia nyụn̄ sana mmọ yak ẹnyọn̄ọ.’ Edidem Israel ama anam akamba usọrọ ọnọ mmọ, ekem ayak mmọ ẹnyọn̄ọ.